Teknologia albisteak
1

Sautrela berriz ere abian

Erabiltzailearen aurpegia
Sautrela - Orio Produkzioak
2004-10-01 : 10:10

Larunbata urriak 2an berriro hasiko da Sautrelaren emisioa. Hasier Etxeberriak aurkeztutako saioak zutabe berbera mantenduko du orohar. Erreportaje nagusi batekin eta elkarrizketatu bat.

Literatura zatiak

Han hemenka literatura zatiak aurkituko dira txertaturik saio guztian zehar: Kirmen Uribe eta Pako Aristi idazleek, txandakaturik, aukeratutako literatur pitxien irakurketak egingo dituzte astero. Kritikaren atala aldiz, Jose Luis Padron, Mari Jose Olaziregi eta Amagoia Iban-en esku egongo da.

Lehen elkarrizketatuak

Lehen saioko elkarrizketatuak Mari Jose Olaziregi EHUko Euskal Filologia Fakultateko irakasle eta literatur kritikaria eta Jorge Gimenez Euskal Editoreen Elkarteko lehendakaria izango dira.

Hurrengo astean, hilaren 6an, Olaziregik Basque Short Stories edo ingelesera itzulitako euskal ipuinen antologia aurkeztuko du Frankfurteko liburu azokan. Euskal literatura mundu anglosaxoniarrean ezagutzera emateko asmoz, Renoko Unibertsitateak abian jarritako Basque Literature Series bildumaren lehen alea dugu aipatu antologia. Bilduma horretako zuzendariak Linda White Renoko Unibertsitateko irakaslea eta Olaziregi bera dira.

Basque short stories-ek hamalau euskal idazleren ipuinak biltzen ditu. Aukeraturiko egileak dira: Bernardo Atxaga, Juan Garzia, Karlos Linazasoro, Xabier Montoia, Lourdes Oñederra, Ixiar Rozas, Harkaitz Cano, Arantxa Iturbe, Anjel Lertxundi, Iban Zaldua, Joseba Sarrionandia, Javi Cillero, Inazio Mujika Iraola eta Pello Lizarralde.

Jorge Gimenez ere Frankfurten izango da, urtero legez, euskal editoreen izenean. Bai bera bai Olaziregi Basque short stories bezalako proposamenek euskal literaturari ekar diezaioketen onurez, Frankfurteko azokaren garrantziaz zein itzulpengintzaren beharraz mintzatuko dira Hasier Etxeberriarekin.

Literatura eta zinema

Bien bitartean, lehen saioko erreportaje nagusiak literatura eta zinema izango ditu hizpide. Montxo Armendariz hasia da Bernardo Atxagaren Obabakoak liburuari buruzko filma egiten, baina hau ez da euskal liburu batek pantaila handira jauzi egiten duen lehen aldia. Hortxe daude Zergatik Panpox, Hamaseigarrenean aidanez, Ehun metro… Euren esperientzia pertsonalean oinarrituta, literaturaren eta zeluloidearen arteko harremanari buruz hitz egingo dute Arantxa Urretabizkaiak eta Xabier Elorriagak.

Erantzunak

miren gabantxo
2004-10-01 : 15:25

Zein opari ona Basque Short Stories edo ingelesera itzulitako euskal ipuinen antologia aurkeztea Frankfurteko Liburu Azokan, Urriak 6an. Egun horretan nik urteak egiten ditut eta Euskal Literatura mundu anglosaxoniarrerako ikusgai dagoela pentsatzeak, Interneten, mundu globalizatu honetako begi batek baino gehiagok irakurriko duela hausnartzera eraman behar gaitu. Ospatzeko modukoa, ezta?


Sareetan antolatuta ikusten dut nik mundua. Eta euskal saretik beste sareetara salto egiteko, itzultzailearen bitartekari lana ezin dut ahaztu. Bernardo Atxaga, Juan Garzia, Karlos Linazasoro, Xabier Montoia, Lourdes Oñederra, Ixiar Rozas, Harkaitz Cano, Arantxa Iturbe, Anjel Lertxundi, Iban Zaldua, Joseba Sarrionandia, Javi Cillero, Inazio Mujika Iraola eta Pello Lizarralde. Euskal saretik kanpo, idazle hauek zer kontatzen duten inork ote daki? Ba al dago interesik honetan?


Antza denez, bapatean, interesa badago, Frankfurten aurkeztuko den bildumarekin batera, Londoneko Royal Festival Hall-ean, Urriak 6an, egun berean, Amaia Gabantxok, Basque Short Stories bilduman itzultzaile lanetan ibili dena, University of East Anglian Literatur eta Itzulpen irakaslea dena eta Times Literary Supplement eta The Independent-eko egunkarietan literatur kritikaria dena, Bernardo Atxagarekin batera, azken olerkien itzulpenak irakurriko baititu ingelesez.


New Poetry Live! egunak antolatu dituzte Royal Festival Hall-ean. Beraz, Urriak 6an, nire urtebetetzean, arratsaldeko 7:30etan, Londoneko Belvedere Roadetik ibiliz gero, sartu aretoan eta gozatu Poesia Berria zuzenean entzutean. …Amaia nire ahizpa da.


Informazio gehiago, klik eginez hemen


Erantzun

Twitter ikonoa  Facebook ikonoa  Sartu