Munduko Hizkuntzen Amarauna bideari ekiteko prest

Aurkezpen ofiziala bihar izango da Bilbon, Euskaltzaindiaren egoitzan (Pza. Berria, 15), arratsaldeko 18:30. Bartzelonan berriz, maiatzaren 22an aurkeztuko da, Forum 2004ko egitarauaren barnean. Bartzelonako aurkezpenaz ere Unesco Etxea arduratuko da eta bertan izango da Amaraunaren Batzorde Teknikoa ere.

Parte hartze irekia

Amaraunean edozein pertsonak nahiz erakundek parte hartu ahal izango du: lanak aurkeztuz, bere ezagutzak eskainiz eta bere esperientziaren ondorioz bildutako jakituria ekarriz. www.amarauna-languages.com on-line dagoen elkar trukerako gunea da.

Hizkuntza-ondarea eustearen garrantziaz arduratutako lagun, ikerlari, lantalde, elkarte, erakunde eta abarren eskura jarritako tresna da. Aldi berean, arrisku egoeran dauden hizkuntzen berreskurapenerako hizkuntza-politikarik eraginkorrenak bultzatuko du.

Hizkuntza-ondarea eta aniztasuna oinarri

Bere helburua da munduko hizkuntza-ondarea eta aniztasunaren garrantziaz ohartu diren pertsonen eta erakundeen arteko harremanak bultzatzea eta sendotzea. Hona hemen helburuak:

• Zabalkundea. Munduko hizkuntza ondarearen garrantzia nazio artean zabaltzea informazio berezituaren bitartez, eta ondare hori gorde beharraz iritzi publikoa sentsibilizatzea. Horretarako, ezinbestekoa da Euskal Herrian burutu den UNESCOren Munduko hizkuntzei buruzko txostena zabaldu eta hedatzea.
• Ezagutza. Amaraunak hizkuntza erkidego gutxituen egoerari buruzko ezagutza sakondu eta indartu nahi du, eta horretarako azken urteetan jasotako baliabide zientifiko eta funtzionalak erabiliko ditu. Era horretan, Txosteneko informatzaileez gain, gainontzeko erkidegoen informazioa biltzen saiatuko da.
• Lankidetza. Hizkuntza ondareari buruzko sentsibilizazioan partaide diren nazioarteko zentro, instituzio eta erakundeen arteko harreman zuzenak bultzatuko ditu.
• Didaktika. Hizkuntza aniztasunari buruzko informazioa euskal eskoletan zabalduko duen material didaktikoa prestatzea. Hezkuntzako ziklo ezberdinetarako material berezitua prestatzea, hau da, lehen eta bigarren hezkuntzetarako.
• Euskal Herriaren presentzia nazioartean ziurtatzea. Euskal Herriak hizkuntza gutxituen egoeraz duen ezagutza, eta indarberritze prozesuan duen esperientzia hizkuntza berritzeko planetan nazioarteko iritzi publikoan zabaltzen ahalegin berezia egin beharko luke.