Teknologia albisteak

Sarean da historiaren gaineko aldizkari elektroniko berria

Erabiltzailearen aurpegia
Idoia Torregarai - UEU
2003-11-25 : 16:11

Udako Euskal Unibertsitateko (UEU) Historia Sailak Historia aldizkari elektronikoa aurkeztu du gaur UEUren Bilboko egoitzan. Aldizkari honetan, kalitatea zainduz, orotariko historia lanei egingo zaie leku eta bere helburu nagusien artean historiagile eta historiazale euskaldunen arteko harremanak garatzea aurkitzen da. Kondaira.com osorik euskaraz izango da eta historia gaiez arituko da, horretan aitzindari delarik. Aldizkaria sei hilero agertuko da eta doakoa izango da.

www.kondaira.com osorik euskaraz izango da eta historia gaiez arituko da, horretan aitzindari delarik. Aldizkaria sei hilero agertuko da eta doakoa izango da.

Mikel Aizpuru Historialariak esanak

Mikel Aizpuru Historialariaren esanetan, gaur aurkezten den aldizkari honek ekarpen handia egiten du: 1973an Udako Euskal Unibertsitatea lehen aldiz antolatu zenetik historiak presentzia nabarmena izan du bertan. Ordutik hona hogeita hamar urte igaro dira. Tarte horretan UEUko Historia Sailak lau belaunaldi ezagutu ditu, euskaraz historiaren inguruko ehunka hitzaldi, ikastaro eta jardunaldi antolatuz. Aldi berean euskal autogobernuaren garapenak maila unibertsitarioan eta ez unibertsitarioan historia euskaraz irakastea ahalbidetu du. Nolanahi ere euskaldun historialariek oraindik hainbat erronka dituzte.

Hutsune nagusietako bat irakasgai eta hitzaldietan euskaraz esandakoa testu-idatzira eramateko zailtasuna da. Hola, maila idatzian ez dira gehiegi euskaraz historiaren inguruan ekoizten diren artikulu eta liburuak. Horregatik, hainbat alorretan aurrera egin bada ere, 1981ean UEUko historia sailak aipatu zituen xedeak, hein handiz, oraindik eginkizun daude: Historialari sakabanatuak elkarganatzea eta euskal historialarien arteko koordinakuntza indartzea; Historiarako euskara normalizatu bat sortu eta finkatzea eta Historiaz euskaraz egiten diren edo egin litezkeen lanak bizkortu eta zabaltzea". Orain aurkezten den Kondaira aldizkariak asmo hauek guztiak gauzatzen laguntzeko aparteko aukera eskain dezake.

Jurgi Kintanak esanak prentsa aurrekoan

Ondoren, Jurgi Kintanak, Kondaira.com-eko zuzendariak proiektu honen nondik norakoak azaldu ditu: "Kondaria.com historiaren inguruko euskarazko aldizkari elektronikoa da. Orain arte ez da euskaraz historian espezializaturiko aldizkaririk egon, eta Kondaira hutsune hori betetzeko asmoz sortu da. Kondaira UEUko Historia Sailak sortu du Bizkaiko Foru Aldundiaren dirulaguntzari esker eta seihilabetekaria izango da. Kondaira doakoa da, eta interneten dago mundu guztiarentzat eskuragarri. Formatu elektronikoak paperezko aldizkariek baino zabalkunde eta aukera interaktibo handiagoak ahalbidetzen ditu. Kondaira historian interesa duten guztiei zuzenduta dago: historia irakasle, ikertzaile, ikasle zein historiazaleei".

Baina zer topatuko dugu aldizkari honetan?

  • Kondaira-ko orri nagusian historia artikuluak agertuko dira, eta haien laburpena ikusi edota artikulu osoa norbere ordenagailura jaisteko aukera egongo da (pdf formatuan). Artikuluen sail hau orotariko historia lanei irekita dago.
  • Artikuluez gain, historiaren irakaskuntzan baliagarriak izan daitezkeen historia materialak (testuak eta mapak) ere aurki daitezke Kondaira aldizkarian. Historia materialen atalean Euskal Herriko zein munduko testu eta mapa historikoen corpus gero eta handiagoa biltzeko asmoa dago, mota honetako materialak dituenak bertan jar ditzakeelarik. Atal hau oso interesgarria izan daiteke Historiaren irakaskuntzarako.
  • Azkenik, historialari eta historiazale euskaldunen arteko harremanak garatzeko eztabaida zerrenda bat ere badago. Era horretara Kondaira aldizkariak, euskaldun historialarien bilgune eta erreferentzia izan nahi du. Beraz sakabanaturik dagoen euskaldun historialarien mundua harremanetan jarri, eta ikuspegi desberdinak errespetatuz, guztientzako plataforma komun bat eratzeko xedez sortzen da Kondaira.

Erantzun

Twitter ikonoa  Facebook ikonoa  Sartu