Aurkitu: Elkarte Kulturalen atari berria
Aurkitu.com proiektua, Aurkitu Internet Elkarte ez lukratiboak kaleratu du eta Internet-en egongo den atari baten bitartez, Euskal Herriko elkarte kultural guztiei doako zerbitzu batzuk emateko pentsatua dago.
Helburuak epe labur eta ertainera:
- Euskal Herriko elkarte kultural guztien informazioa denon eskura leku bakar batean izatea, Aurkitu-k sortuko duen datu-basean.
- Mota berdineko elkarte kulturalak harremanetan jartzea.
- Euskal Herriko elkarte kultural guztien (ofizial nahiz ez ofizialen) albisteak eta idatziak online argitaratzea.
- Elkarte Kulturalak sustatzea.
- Euskal Herrian Euskara sustatzea eta teknologia berrietan (bereziki Internet-en) euskarak duen presentzia indartzea.
- Elkarte Kulturalak kontratatzen dituzten erakundeentzat (enpresa pribatuak, udaletxeak, etab.) erreferentzia izatea elkarteak kontratatzeko garaian.
- Euskaldunok, elkarteek online izango duten agenda kontsultatzea atariaren bitartez.
- Elkarte Kultural guztiek web orrialde propioa dohainik izatea (Euskaraz eta bakoitza beren domeinuarekin).
- Elkarte Kulturalentzat Internet aholkularitza.
- Elkarteek online izango dituzten eztabaidak moderatzea eta giro ona sortzea.
Elkarteek, atariaren bitartez beren burua ezagutarazi ahal izango dute. Atarietan ohikoak diren zerbitzuez gain (eztabaidak, txata, bilatzailea, deskargak, etab.) guztien gainetik balore gehigarria dituzten zerbitzu interesgarri batzuek eskainiko ditugu Aurkitu.com-en, adib.; Euskal Herriko herri bakoitzean dauden elkarte kultural guztiak, datu base aberats batean egongo dira.
Elkarte bakoitzak, bere albisteak online argitaratzeko aukera izango du eta, planifikatuta duten agenda ere denen eskura utzi ahal izango dute; denek jakin dezagun non eta noiz dituzten hurrengo saioak.
Elkarte mota bakoitzak, eztabaidatzeko txokoa izango du, eztabaida pertsonalizatua deritzoguna, beste herriko antzeko elkarteak ezagutzeko, elkar informatzeko, nola funtzionatzen duten ikusteko. Azken finean, harremanetan jarri, elkar laguntza bat izan dezaten sektore bereko profesionalen artean.
Nahiz eta kulturarekin erlazioa duten elkarteei emango diegun lehentasun berezia, edonork erabili eta parte hartu ahal izango du aurkitu.com atarian:
Bai, elkarte hauen informazioa lortu nahi dutenek (enpresek, udaletxeek, etab.), baita ere elkarte edo enpresa izan ez arren albiste kultural bat edo agendan argitaratu nahi dutenek. Elkarteen agenda kontsultatu nahi dutenek edo eztabaidetan parte hartu, posta zerrendetan izena eman, idatziekin... Laburbilduz; atarian izango diren hainbat zerbitzu erabili nahi duen edonorentzat izango da Aurkitu.com proiektua.
Elkarteentzako Internet Zerbitzu eta aholkularitza da Proiektu honen helburuetako bat;
Zerbitzuak
- Atal honetako helburu nagusia webgunerik ez duten elkarteei bat sortzea da. Webgunea dohainik izateko baldintza bakarra aurretik datu-basean egotea izango da. Elkarte hauen webguneek, beraien domeinu propioa izango dute, adib. www.elkartearenizena.org.
Webguneak hizkuntza bakarrean diseinatuko dira, Euskaraz.
- Internet eta webguneak diseinatzen ikasteko ikastaroak, 16 ordukoa bakoitza.
Ikastaroen helburua, guk diseinatzen dizkiegun web orriak beraien gisa berritu eta handitu ahal izatea da.
Zerbitzu hauekin sozialki gauza ugari lor ditzakegu:
- Internet-era konektatzen garen Euskaldunon portzentaia handitzea.
- Elkarte Kulturalak sustatzea.
- Euskarazko edukiak Internet-en gehitzea.
Aholkularitza
Sail honetan egongo den beste zerbitzu bat, aholkularitza deritzoguna da, hau da; domeinuak erosten lagundu, internet-eko bilatzaileetan sustatzen lagundu, prentsa harremanak nola egin erakutsi, beraiek izan ditzaketen web orriaren testing-a egin (azkartasuna, diseinua, etab. berrikusi eta txosten baten bitartez azaldu), internet hornitzaileekin izan ditzaketen arazoak konpondu, prezio onenak aurkitu Internet-era konexioa izan nahi duten elkarteentzat, konexio mota onenak aukeratu, etab.
Aurkitu Internet Elkartea
Erantzunak
Benetan interesgarria ekimena bai.
Baina espero dezagun ekimenak Kultur Elkarte desberdinak batu ditzala, eta ez dadila izan lehendik sakabanatutako komunitatearen zatiketa berri bat.
Esan nahi dut, proposatzen dituzun eztabaida foroetako gai berdinak lantzen dituzten beste foro batzuk badaudela lehendik ere Internet euskaldunean, denbora luzean jendea biltzen saiatu direnak, eta foro berriak sortzeak dispertsioa sortzen du kasu horietan.
Andoni.
aupa Andoni, Aurkitu Internet elkarteko zuzendaria naiz.
Aurkitu.com-en ideia elkarte kulturalei dohainiko zerbitzuak ematea da, web orrien diseinua, aholkularitza, bidaltzen dituzten berri eta idatzi guztiak argitaratzea, etab.
Baliteke zuk esaten duzuna egia izatea, hau da, eztabaida kultural gehiago egotea sarean baina aukera hori eman beharra dugula usten dugu.
Ondo segi
Aurkitu Internet
Zuen asmoen berri jakin eta Webgunean sartu ostean bi zalantzatxo sortu zaizkit:
- Sustatuko aurkezpenean Euskal Herriko kultur talde guztiak azalduko direla diozue baina webgunean, Bizkaia, Gipuzkoa eta Arabako herrialdeak bakarrik azaltzen dira. Zein da horren arrazoia?
- Honetan lanean dihaduzuen taldea nondik sortu da? non zaudete? zein zarete?
Galdera gaixto xamarrak dira baina duda horietxek sortu zaizkit lehenengo begiratuan. Gainontzean asmoa oso egokia dela iruditzen zait.
Kaixo Egoitz,
bai, arrazoi duzu, Euskal Herriko elkarte kultural guztiekin egin nahi dugu lan etorkizunean bainan hasteko euskadi-koekin hasiko gara. Honen arrazoia gure denbora da, imagina 20 elkartek batera web orri bat diseinatzeko eskatzen badigute.
Nondik sortu den ?
Ba urte asko daramatzagu Internet munduan lanean (Inglaterra-tik hasi , denda birtualetan, web orriak diseinatzen, estatu espainiako beste web orriekin elkarlanean, etab.) eta orain 2 urte hutsune haundia zegoela internet sarean ikusi nuen euskal kulturari zegokionez eta honekin loturiko proiektu bat pentsatu eta buru belarri sartu nintzen berarekin (udaletxe batzuekin hitzegin, elkarte kultural batzuekin, etab.) honarte.
Aurkitu Internet elkartea Azpeitian dago, Gipuzkoan, eta 3 pertsonen artean burutzen hari gara ( 2 periodista eta informatiko bat ).
Ez dakit jakin nahi duzun guztia al den baina beste edozein zalantza izan ez gero, guztora azalduko dizkizut.
Ondo segi
Aitor Priya Beitia
Aurkitu Internet
Nahikoa esan didazu eta neuri behintzat kontua hobeto kokatzeko balio izan didate zure erantzunek.
Neu Soraluzeko euskara elkartekoa naiz eta web orriaren gaiari bueltatxo batzuk eman izan dizkiogu lehenago ere. Aurrera egitea erabakitzen dugunean (ahalik lasterren) joango gatzaizkizue eskean eta eskeintzan.
Eskerrikasko Aitor eta zorte on!
- Euskal Herriko elkarte kultural guztien informazioa denon eskura leku bakar batean izatea, Aurkitu-k sortuko duen datu-basean.
Berri ona da, dudarik gabe, Aurkitu.com bezalako gune berri baten plazaratzea, baina orain dela hamabost egun eskas beste atari baten plazaratzea (Kulturgida, alegia) etortzen zait burura. Uste dut une hartan Garikoitz Araolaza-k aipatu zuenak merezi duela berriro errepasatzea: Agenditisa: internet euskaldunaren beste zatiketa bat. Atari eta webgune gehiago prestatu eta kaleratu baino ez al da premiazkoagoa webgune hauen elkartasuna bilatzea? Hain zuzen edukien sindikazio tekniken bitartez, Garik aipatu zuen XML/RDF-a bezalako formatoak erabiliz?
Oso interesgarria eta pozgarria da horrelako webguneak ikustea.
Gizarteari asko lagun diezaioke webgune honek, ea suertea dagoen.
Gure elkartea sartu dugu iada eta albisteren bat bidali ere, laiste planifikaturik ditugun ekintzak jarriko ditugu aurkitu.com webgunean zuek denok ikusteko, ea webgunea diseinatzen diguten.
Oso berri ona