'Argia'-ko Estitxu eta Ixiar Eizagirre, 'Rikardo Arregi'-ko saridun nagusiak
Argia aldizkarian 2002ko ekainetik 2003ko maiatzera kaleratutako elkarrizketa sortagatik, Estitxu eta Ixiar Eizagirre kazetari hernaniarrek irabazi dute XV. Rikardo Arregi kazetaritza sariko lehen saria.
Eguna, Egunkaria eta Egunero aldizkariak; Goienkaria Debagoieneko astekaria; eta Euskadi Irratiko kazetariak izan ziren beste sarituak.
Ekitaldia joan den zapatuan izan zen, ekainak 28, Andoaingo udaletxean.
Estitxu eta Ixiar Eizagirrek Argia aldizkarirako egindako elkarrizketa sortak merezi zuen XV. Rikardo Arregi kazetaritza sariaren errekonozimendu gorena. Hala erabaki zuen Jose Antonio Pérez Gabarain, Jose Inazio Basterretxea, Allande Boutin, Mikel Irizar, Laura Mintegi eta Koldo Ordozgoitik osatutako epaimahaiak.
Kalitate handiko elkarrizketak direla nabarmendu zuen epaimahaiak; eta gaineratu zuen, bertan ez dela pertsonaiaren azaleko azterketa soila egiten, baizik eta elkarrizketa ikuspuntu sakon batetik bideratzen dute, pertsonaia bera aberastuz. Dokumentazio lana, lan grafikoa eta, kasu batzuetan, itzulpen lana ere txalotu zituen epaimahaiak.
Euren berbaldi laburrean, Eizagirre ahizpek salatu zuten euskarazko nazio prentsaren egoera, besteak beste.
Bi salbuespen
Ezohiko bi sari edo aipamen banatu dira aurten. Alde batetik, Ohorezko Aipamena, Eguna, Egunero eta Egunkaria argitalpenei, hain zuzen. Errekonozimendu horren helburua zen historian zehar euskara hutsean kaleratu diren egunkariei eta hauen bitartez egunkari hauek sortzeko kemena eta gaitasuna izan duen euskal gizarte osoari eskerrak ematea. Hiru egunkariok Berria jaio arte egin duten lana nabarmendu zuen epaimahaiak. Agustin Zubikarairen alaba Edurnek, 'Eguna'-ren izenean; Joan Mari Torrealdaik, 'Egunkaria'-renean; eta Eneko Bidegainek, 'Egunero'-renean, jaso zuten saria.
Bigarren salbuespena izan zen Aipamen Berezi bat. Goienkaria Debagoieneko astekariak urtarrilean argitaratutako Billy Petersen C.S.I. telesaileko aktoreari Leire Kortabarria kazetariak egindako elkarrizketa nabarmendu zuen epaimahaiak aipamen horrekin. Honako alderdiak aipatu zituen epaimahaiak: pil-pilean zegoen telesail bateko izar atzerritar batek Euskal Herriarekin izan dituen hartu emanak aurkitu izana eta dokumentazio lan sakon batekin osatu izana. Berriak erdal hedabideetan izan duen oihartzuna ere nabarmendu zen.
Kazetari Berria
Aurten, Kazetari Berriaren sarirako inoiz baino lan gehiago aurkeztu direla adierazi ondoren, gehienez 25 urte dituzten kazetariendako saria banatu zen Andoainen. Amets Arzallus kazetari eta bertsolariari egokitu zitzaion saria, Euskadi Irratiko Goizean Behin saioan 2002ko ekainetik 2003ko maiatzera bitartean egindako kolaborazioengatik. Irratira ondo egokitutako lan txukunak, gai aberatsak eta gaurkotasun handikoak eta teknika zaila izatea azpimarratu zituen epaimahaiak, besteak beste, Arzallusen lana aukeratzeko orduan kontuan hartutakoen irizpideen artean.
Datorren urtetik aurrera, Kazetari Berriaren sarira aurkeztu ahal izateko adin muga 27 urtera igo dute antolatzaileek.
Erantzunak
Eizagirretarrei zorionak. Gertutik jarraitzen ditut egindako elkarrizketak. Amets Arzallusena iritziak ere gustora entzundakoa naiz.
Baina bereziki zorionak eman gura dizkiot, bertsolari ez izanda, saria irabazi duen Leire Kortabarriari. Elkarrizketa hori Sustatun ere eman genuen inork irakurri gura balu.
/cache/Udako-Ola-2024_1_small_content.jpeg)
Zorionak Estitxu eta Ixiar Eizagirreri. Baita beste saritu guztiei ere; Goienkarikoaren erreferentzia beste hedabide batzuetatik jaso nuen; Amets Arzallusen kolaborazioa, berriz, entzun dudan apurretan beti iruditu zait bikaina. Aurrekoan Euskadi Irratiari buruz bota zirenak gehiegikeria ere badirela ohartarazteko balioko ahal du.
Egin ondotik azkar ahazten den lana izan ohi da prentsakoa, eta hortaz badirudi berdin dela ondo edo gaizki egin, edo ez dela behar beste estimatzen lan txukun bat egiteko aurretik sartu beharreko ordu mordoa. Bihoakie zorion-agur hau, sarituei bezala, saririk gabe ere bere kazetaritza-lana maitasunez eta talentuz egiten duten guztiei.