Azken Ostielan kooperatibismoa albiste

Hemen Ostielakoek zabaldu duten Prentsa-oharra

"Ostiela!"-ren 29./30. zenbakiak batean
Aldizkarian "Arrasateko Errepublika Teokratikoa" eta gaien pupurria

Oraingoan ere ale berezia burutu du "Ostiela!"-k, bi zenbaki batean (udaberri/udari dagozkienak), 80 orri guztira, baina prezio berean: 3 euro ziztrin. Ekainean zehar banatuko da ale "azpi-kultura"-zalea. Lelo ez hain leloak dakartza ohiko moduan, hau da, "sesioa, xextra eta kalamatrika" azal-kontrazaleko collage-ak dioen bezala...

• Gai nagusia: "ARRASATEKO ERREPUBLIKA TEOKRATIKOA..."


• "...edo Lamaismo industriala eta euskal mitoen biztuera"... 20 orritako gehigarrian lan zientifiko baten laburpena dator.

Txantxa erraldoi bat burutu dute lankidetzan Ramon UGALDE arrasatearrak, Berlingo Unibertsitateko "Alexander von Humboldt Sozialgeographie Institute" eta "Escoriaza University"-ko "Faculty of Humanities and Public Resources" delakoen artean. Aidanez, bi urtetan zehar unibertsitate bietako irakasleak eta goi mailako ikastaroetako ikasleak lanean aritu dira zientzia desberdinak jorratuz (Antropologia, Artea, Giza geografia, Mitologia, Erlijio Konparatuak, Historia, Biografia, Geopolitika...). Ikerketaren helburua Arrasateko kooperatibismoa eta Don Jose Maria Arizmendiarrietaren irudi eta ekimenaren azterketa xoil bat egitea zen hasiera batean. Baina beren lanak aurrera egin ahala uste bako bideetatik murgildu ziren. Ikerketaren emaitzak harrigarriak izan dira: alde batetik, budismo eta lamaismoarekin aurkitu dituzten harremanak, eta bestetik Euskal Folklorearen mitoak errepikatzen ari direla dirudielako. Mondragoe mitikoaren, Arrasateko bizitzaren eta intrahistoriaren gurpilak aztertzen dira luze eta zabal: Arrasateko Mogimendu kooperatibistaren sortzailearen berri, "fedearen zabalkundea", Arrasate Hiri Berria: Paradisurako Erakikuntzak, Garaipenaren irudi berriak, Adierazpen herrikoiak, Erlijio berriaren estrategiak, Folklore berria, Maritxu Kajoi, "MCC: la joya de la Corona" e.a. jorratzen dira, bibliografia aberatsaz baliatuz. Txantxa handi honek ez dauka galerarik, makina bat bitxikeria ageri da bertan eta merezi duen irakurketa horietakoa da...

• Bi (edo hiru) ELKARRIZKETA:


• Nagusia, Jose ULIBARRENA eskultore nafarrari egin zaio. Artista eta "arte-sanu" bitxi honek ez du zarbarik ahoan esaldi polemikoak botatzerakoan ere. Adib., Txillida eta Oteiza "modernikola eta kajistatzat" ditu, bizi zirenean bezala jada hilda daudenean ere: "Egin dituzten horiek kutxa metafisikoak/ estratosferikoak badira, nik ez dakit zer klasetakoak... ba, nik zera esaten diet: kaja bat edozein enbalaje-egilek egiten dizu. Beraz, ez niri etorri kontu horiekin!". Oteizaren oinordeko sentitzen bada ere, haren desmontatzaile ere bada: "Oteizak, berez, grazia bazuen, eta baita paradoxa ugari ere, Unamunok bezala. Apezak, apezpikuak eta Aita Santua bera bezalakoa zen, inoiz ez zizun gauza zehatzen inguruan hitz egingo, beti gauza abstraktoei buruz ari zen"...


• Bestetik Pierre BORDIEU soziologo zenari eginiko elkarrizketa ere jaso da. Frantziar ezkertiar honen arabera, telebistak beste komunikabideetan eta kazetaritza praktikan duen eragin arriskugarriaz ari da, esaterako: "Telebista da jokoa zehazten duena: mintzagai izango diren gaiak, zein pertsonak diren inportanteak eta zein ez. Hala ere, telebista, beste kazetaritza guztiarentzat alienatzailea dena, bera ere alienatua dago, zeren oso bereziki menpeko bizi baita merkatuaren ezarpen zuzenen pean".


• Hirugarren elkarrizketa bat ere bada, mintzagai: ETArekin egin zutela esan zen, baina "Santurtziko Sardiñera" batek AITArekin egin zela uste du. Zergatik? "Batez ere inortxok ez duelako `ezer´ esan. Ez erantzunik, ez `Hi, berriz txapa bera?´. Ezer ez, isiltasuna. AITAk hitzegiten duenean, seme-alabak i-xi-lik, badaezpada ere". Bukatzeko, mesedez eta faborez jubilatzeko eskatzen dio AITAri.

-"PUPURRIA" gizarte-sailean:

-INDETERMINAZIOA aldarrikatu du Iñaki SEGUROLAk oraingoan, Barañaingo "Astopituak" taldearen "Nafarroa gorroto dut" aipua ekarriz: "Ez euskaldun, ezta nafar, ez espainiar, ez europear, nahi duguna gara" (Ulibarrenak ere badio halako zerbait, portzierto). Hurrengoa bezalako bitxiak: "Gaurko euskaltzale garatuaren `zale´ hori esnezalearen `zale´ hori berori da, esne-saltzailearena: euskararen balio erantsia, fakturazioa e.a. zikin bat. Ama euskara putatu, prostitutatu, irabazian jarri eta haren proxeneta bihurtu. Ez da plan makala, ez da plangintza estrategiko makala".

• VOTA al P.A.N: balizko "Partido Apolitico Navarro"-ari buruzko libelo anonimoa da honokoa; bertan, parodia klabean, berau sortzeko arrazoiak, helburuak, oinarriak eta programa irrigarriak datoz. Barre ugari egiteko lain ematen du eta, nafar gazteleraz etorri arren, argitaratzeak merezi zuen!


• Joxemiel BARANDIARAN "Ataun San Gregorioko bizitzaren eta kulturaren aldaketak XX. mendean" idazlan interesgarria itzuli da euskarara. 1900etik 1971 bitarteko aldaketak eta jakingarriak aipatzen dira. -Gainerakoan,"ESKWARAren Berri Onak: proposamen onest batzuk" egiten dizkio Ramon UGALDEk Euskaltzaindia/ Acatzaindiari; FREAKien munduari buruzko erreportaje bat ere bada; ARGENTINAko berri e-mail baten bidez ezagun liteke zerbait, interneteko zaborretik jasotako bitxikeriak badira, Marcos zapatista eta paisa marrokiarrak hizpide...


• (in)KULTURA sailean:


• "ESOTERRORISTAK": Aurreko OSTIELA!-ko "Kurt Cobain hil zuen amets-makina"-ren jarraipen gisakoa da eta aurten atera genezakeen "E.H. Underground" gehigarriaren 1. abiapuntua izan daiteke: Beat belaunaldia, 1980.

Hamarkadako talde punki-industrial batzuk eta magia beltza zein terrorismoa nahasten ditu, hitz laberinto iluna osatuz. "Ezer ez da egia. Dena da zilegi": Haxixinoen esaldiak eragin latza izan zuen. - Aleister CROWLEYk ere Magia beltzarekin zerikusirik badu: mago honek esan zuen, halaber, "Egizu nahi duzuna izango da lege bakarra"... Munduko gizonik gaiztoenaren bizitza ikaragarria eta obra iraunkorra errepasatu da.

• Gainontzean, Pako ARISTIk Bitoriano GANDIAGA poeta zendu berriaz artikulu bat, beste ipuin labur eta poema bat ere aportatu ditu, "Gauza txikien liburua"-ren aurrerapen gisa. Pablo SASTREk, gazte jentilak SISTEMAn nola moldatu aholkuak ematen ditu 2. entregan; Sabino ARANAk 1902an kaleratu zuen "El baskuence en toda el Afrika" edo euskal abertzaletasunaren fundatzailearen adarra jotzeko makina martxan jarri dugu, gaztelaniazko testu luze eta bitxi baten 2. entrega eskainiz; Joxean ORMAZABALen "Antonio Bolas"-en notiziak eta Goizuetako Ezponda-renak ere badira; Annie SPRINKLE emakume pornoduna nor den...

Komuneko Liburutegia sailean, Juan GARTZIAren "Joskera Lantegi" luze disekzionatzen du Angel GARCIA ETXANDIk; Txema GARCIA-VIANAk, berriz, Markos ZAPIAINen "Errua eta Maitasuna"; Andoni TOLOSAk TAPIA eta LETURIAren "Hain zuzen", eta, azkenik, Karlos PERALES ZEBERIOK epitafioa idatzi du: "Joe STRUMMER in memoriam"

Irakurgai ugari udarako, beraz. Ahaztu ditugun ahaztezinezko beste umorezko "trepete" batzuk ere badira, lelo ez hain leloentzat onak direnak, den-dena erdi prezioan... E.H.-ko liburudenda/kiosko hoberenetan!