Diru laguntzak frankismoaren biktimei

Eusko Jaurlaritzaren Etxebizitza eta Gizarte Gaietako Sailak diru laguntzak emango die frankismoaren garaian espetxea edo jazarpena nozitu zutenei.

Onuradunak

• Diktaduraren jazarpena pairatu zutenek, baldin eta 2002ko azaroaren 29a baino lehen 65 urte bete badituzte.
• Pertsona onuraduna hilik badago, senarrak, emazteak edo bikoteak jasoko du. Baita haien seme-alaba ezinduek ere.

Baldintzak

• Sei hilabete edo gehiago egotea espetxean, deserrian edo derrigorrezko lanetan.
• Gutxienez urtebete jarraian erroldatuta egotea Euskal Autonomia Erkidegoan, 2002ko azaroaren 29a baino lehen.

Diru kopuruak

• Kartzelaldia 6 hilabetetik 12 hilabete bitartekoa izan bazen, diru laguntza izango da 7.200 eurokoa (1.197.979 pezeta.).
• Beste sei hilabeteko denboraldi bakoitzeko, 600 euro (99.832 pta.).
• Gehienez jota, 9.600 euro jasoko dira (1.597.306 pta.).

Diru laguntza hauek jasotzen dituztenek ez dute zergarik ordainduko kopuru hauengatik.

Beharrezko agiriak

• Jatorrizko agiri bat edo fotokopia, ziurtatzen duena eskatzaileak zenbat denbora egin zuen askatasunik gabe.
• Ziurtagiri bat, erakusten duena eskatzaileak ez duela jaso dirurik beste herri erakunde batetik arrazoi berberagatik.

Zergatik diru laguntza orain

Javier Madrazo Etxebizitza eta Gizarte Gaietako sailburuak honela azaldu du zergatik emango dituzten diru laguntza hauek, etxez etxe banatu dituzten eskuorrietan:

“Berez ekimen hau begirune eta mirespen testigantza da: hala ere, aldi berean, iragana ahaztuarazi nahi digutenei aurrea hartu eta memoria historikoa berreskuratzeko aukera ere bada. Gure iritziz, Eusko Jaurlaritzaren proposamenak, trantsizioan osatu gabeko zauria sendatu nahi du. Izan ere, orduko agintariek, nahi ez zutelako edo ez zutelako jakin nola egin, ez zuten diktadura salatu. Ez zuten Errepublikaren legitimitatea onartu eta faxismoaren eta totalitarismoaren aurka borrokatu zutenei ez zieten inolako omenaldirik egin. Jende horrek guztiak egindako borroka eta izandako sufrimendua ez zela alferrekoa izan esan nahi diegu, askatasunaren eta aurrerapen ekonomiko eta sozialaren alde borrokatu zutelako”.

Beraz, senitartekorik baduzue, baldintza hauek betetzen duenik, telefono honetara jo dezakezue, argibide gehiagoren bila: 945 01 81 80. Eskariak aurkezteko epea otsailaren 28an itxiko da.