Sarrionandiaren "Lagun izoztua" eta hitz elkarketa

Lagun izoztua-n, Joseba Sarrionandiak era egoki, jolasti eta ederrez darabiltza euskarak hitz elkarketak sortzeko eskaintzen dituen baliabideak.

Asmatutako toponimoez gainera (Kalaportu eta Kaioarri, EGUZKI LORE moldekoak, eta Harriandi, Harrizorrotzetako izkinada, Kaiondo, BAHUVRÎHI moldekoak)

politak dira halaber

• DVANDVA hauek:

  zakilpotro ilun (327 orrialdea), ur urdingrisen (391)

• EGUZKI LORE tankerako

  Albiste niagara (28), argi gortina, mamu giroa (213), izotz tontor (230), izotz kristal (327), izotz muino, itsas amildegi, amildegi ertz (312), elur lautada, izotz zola (323), aluminio xafla, elur hautsa (324), izotz kristal (327), izotz erorketa (329), gortina kiribil (329), azabatxe puntu, grafito marratxo (341), odol lorratza, odol zorrotada, itsaso basamortu, izotz tontor gainak (361), buztan brauntada (379), izar haustegian (391), izotz zintzilikariok (358)

• braustada eman (236) ADITZ ELKARTEA
• elur kristal sastakatzaileen (287) HITZ ELKARTE SINTETIKOA
• JARLEKU moduko segitalde (433)
• LOTSA GABE tankerako aberrigabe (391)
• BAHUVRÎHI biok: buruzut (230), murutzar (282).
• Lagun izoztua-k, emankortasun bizi horretaz gain, marratxoa saihesteko jarrera irmoa erakusten du. Izan ere, DVANDVA delakoetan ere ez da agertzen:

(gorago aipatutakoez gainera) lauzpabost (30), izen abizenak (33), buru bizkarren, zortzi hamar, hamasei hamazortziko (342), hona hara (345), hirulau (392).

• Ezta BIKOIZTAPENETAN ere, edo SINBOLISMO FONETIKOZ ETA HOTS UZTARDURAZ SORTURIKO HITZARTEETAN:

batbatean, apur apurka (282), bel beltzetan (286), ezmezean (287), zuzen zuzenean, han hemenka (309), sakon sakonean , bizi bizian (310), zabal zabalik (323), erdi erdian (324), etsi etsi (326), ari arian (329), zuri zuriak (329), albo albotik (345), jirabiraka (358), tarra tarra (361), luze luzeak (362), neke neke (363), sakon sakonean (364), astiro astiro (379), bakar bakarrik, ozta ozta (380), begi begira (381), epel epela (391), gain gainean (392), goiz goizetik, bruu bruu (432).

Marratxoa baztertzeko joera (hildako baten jaiotza-heriotza datak emateko baino ez da ageri) berariaz, espreski eta gurata dago desarratua.

Zergatiak, noski, hipotesi hutsak dira, Sarrionandiak berak, nik dakidala, ez baitu deus ere adierazi honen inguruan.

Baliteke aholkuen ugaritasun eta zailtasunaren aurkako protesta antzeko bat izatea, edo, Arestik Ç hura zerabilenean bezala, Euskaltzaindiari presio egiteko era bat, erabaki garbi eta sentzilluak har ditzan behingoz.

Baina baliteke orobat Sarrionandiak gustuko ez izatea marratxoz josiriko orrialde batek hartzen duen itxura estresagarria.

Edonola ere, marratxorik ezak ez du testua ulergaitzagoa bihurtzen; Lagun izoztua-n ez dago anbiguotasun nekagarririk.