Euskara eta informazio teknologiak: diru laguntza deialdia

Aste honetan argitaratu da Gipuzkoako Aldizkari Ofizialeko ale honetan, Martxoaren 5eko 7/2002 FORU DEKRETUA, Kultura, Euskara, Gazteria eta Kirol Departamentuko Euskararen Normalkuntzako Zuzendaritza Nagusiak kudeatutako programen kontura diru laguntzak emateko oinarriak onartzen dituena.

Hamar alor hartzen ditu deialdiak bere baitan:

1. Euskarazko aldizkako argitalpenak.
2. Euskara sustatzeko proiektu eta jarduerak.
3. Euskal kulturaren alorreko edukiak informazio teknologien bidez hedatzeko proiektuak.
4. Euskarazko ikus-entzunezko proiektuak.
5. Euskarazko ikasmateriala ekoizten duten argitaletxeen oinegitura (EIMA).
6. Gipuzkoako Lurralde Historikoko ikastetxeetan zabaltzearren euskaraz argitaratutako liburuak hautatzea (EULI).
7. Gipuzkoako Lurralde Historikoko udaletan zabaltzearren euskaraz argitaratutako ikus-entzunezko materialak hautatzea (EUBI).
8. Unibertsitate gaien oinarrizko euskal liburutegia.
9. Kirol prestakuntza edo hedakuntzako materialak euskaraz argitaratzea.
10. Itzulpen praktikak egiteko bekak.

Sustatu-ren izaera eta interesekin duen lotura zuzenagatik, puntu batekoa nabarmenduko dugu: Euskal kulturaren alorreko edukiak informazio teknologien bidez hedatzeko proiektuak.

Kasu honetan, diru-partidak 186.000 euro pasatxo dira (31 milioi pezeta), aurkeztutako proiektuen artean banatzeko. Eskaerak aurkezteko epea, apirilaren 26an ixten da. Deialdi guztietarako eskabide orriak hemen* dituzu, teknologia berriei dagokiena, berriz, hementxe.*

Euskarazko kultur edukiak informazio teknologien bidez hedatzeko proiektuetarako diru laguntzak emateko lehiaketa irekia arautzen duten oinarriak

Xedea.

Deialdi honen xedea da urte honetan kultur alorreko informazioa eta edukiak euskaraz informazio teknologien bidez hedatzeko proiektuetarako xedatutako diru laguntzak jasotzeko baldintzak lehiaketa irekiaren bidez arautzea.

Eremua.

Diru laguntza hauen xedea da euskarako kultur edukiei zabalkunde handiagoa emateko informazioaren teknologia berrien erabileran oinarritutako proiektuak garatzeko erakunde eskatzaileak egindako gastuak konpentsatzea.

Laguntza hauek jaso ahal izango dituzte aipatutako esparruan proiekturik sustatu eta egiten dituzten pertsona fisiko nahiz juridikoek, egoitza sozial eta fiskala Gipuzkoako Lurralde Historikoan kokaturik baldin badute.

Aipatutako proiektuak ondoko atal hauetakoren batean sartu behar dira:

• Elkarte eskatzaileen edukietatik abiaturik, webguneak sortu, eguneratu edo hobetzeko proiektuak egitea.
• Komunitate lokalei loturiko proiektuak sortu edo garatzea sarean.
• Interneteko edukiak lokalizatu (l10n) edo internazio-nalizatzea (i18n), baldin deialdi honen jarduera esparruan interesgarriak izan badaitezke.
• Informazio teknologia berrien inguruan populazio euskaldunari begira euskaraz emandako prestakuntza proiektuak egitea.

Laguntza hauen jarduera esparruak bere barne hartzen dituen proiektuak, osorik nahiz zatika, garatu ahal izango ditu elkarte eskatzaileak bere baliabide propioz nahiz beste laguntzaz.

Baldintzak.

Laguntza hauetara bildu nahi duten proiektuek baldintza hauek bete beharko dituzte:

• Proiektuaren edukiak osorik euskaraz egongo dira gutxienik.
• Eduki horien barruan legeetan babestutako gairik baldin badago, elkarte eskatzaileak eduki horien gaineko baimenaren jabe izan behar du.

Baztertzeak.

Diru laguntza hauen esparruaz kanpo daude:

• Izaera komertzialeko proiektuak, produktu edo zerbitzu jakin bat saldu edo sustatzeko helburu nagusia dutenak alegia.
• Webgune pertsonalak.
• Eduki batez ere politiko, sindikal edo erlijiosoa duten proiektuak.
• Edozein era edo mailatako irakaskuntza erakundeei lotutako proiektuak.
• Eduki iraingarria edota pertsonen eskubideen aurkakoa duten proiektuak.
• Edukietara sartzeko edonolako mugakizuna jartzen duten proiektuak edo zerbitzuaren trukean ordainketa eskatzen dutenak.

Eskaerak aurkeztea.

Diru laguntza hauek jaso nahi dituztenek agiri hauek bidali behar dituzte Kultura, Euskara, Gazteria eta Kirol Departamentura:

• Deialdi hau arautzen duen foru dekretuko 4.1 artikuluan xedatutako agiri guztiak.
• Edukien barruan Jabetza Intelektualaren Legeari lotutakorik baldin badago, elkarte eskatzaileak eduki horiek erreproduzitzeko baimenaren jabe dela argi egiaztatzen duen frogagiria.

Eskaerak aurkezteko epea izango da diru laguntza hauen deialdian xedatutakoa.

Balorazioa eta diru laguntza ematea.

Diru laguntza emateko eta zenbatekoa erabakitzeko alderdi hauek guztiak baloratuko dira:

• Elkarte eskatzaileak bere baitan sortutako informazio eta edukiak edonoren esku jartzeko ahalegina; 40 puntu bitarte.
• Orain arte sarean euskaraz trataera egokirik izan ez duten alor edo gaietan saiatzea; 20 puntu bitarte.
• Baliabide teknologikoen ahalmenak taxuz erabiltzeko egindako ahalegina; 15 puntu bitarte.
• Proiektuaren edukiak etengabe eguneraturik izango direla ziurtatzeko jarritako bitarteko egokiak; 15 puntu bitarte.
• Forma edo diseinu aldetik landua izatea, argia eta erabilerraza; 10 puntu bitarte.

Epaimahaiaren proposamenean jaso ahal izango dira, bakar-bakarrik, aurreko irizpideen arabera 70 puntu edo gehiagoko balorazioa lortzen duten proiektuak.