Indymedia Euskal Herria abian da
Mezu honen bitartez eta Euskal Herriko herri mugimenduarentzat interesgarria izango delakoan, sortu berri den ekimen bat aurkeztu nahi dizuegu. Hainbat kolektiboetako eta komunikabide independienteetako zenbait pertsona biltzen hasiak gara Indymediaren bertsio lokala Euskal Herrian sortzeko. Seattleen jaio zenetik,orain bi urte, MMEren gailurren kontrako protestei babes mediatiko independitea emateko asmoz, Indymedia famatua bihurtu zen.
Ekimen horrek ez zuen interes komertzial bat bere atzetik; ez zen erakunde jakin baten fronte mediatikoa; ideologia aurrerakoia zuten pertsonen ahalegin kolektibo baten emaitza baizik.
Indymediak, kaleko hiritarra kronista edota kazetaria bihurtzeko gonbitea egiten du. Informazioaren garaian, komunikazioa boterea bihurtu da, horregatik komunikazioaren demokratizazioa behar dugu. Horretarako Indymediak argitarapen irekia komunikazio sistema plazaratzen du, bakoitzak kronika, argazkia, soinua edota irudia dagoen tokitik bidali dezake. MIGek, (Medio independienteen guneek) bai sarean baita aurretik deitutako bileretan ere, eztabaida irekiak egin behar dituzte. Asanbladek kontsentsuaren bitartez funtzionatzen dute.
Nahiz eta Seattlen jaio, Indymediaren portalak hainbat herrietan sortu dira. Lehenengo, EEBBetako hiri nagusietan: San Francisco, Baltimore, Bufalo, NYC. Geroago, bere bizilagun Kanadiarrek ideiari ekin zioten baita ere. Bi urte igaro dira ekimen hau martxan jarri zenetik, eta dagoeneko 60 atari inguru daude mundu osoan. Besteeak beste, hiri eta herri hauetan sortu dira Indymedia atariak: Israel, Brasil, Argentina, Chiapas, Bartzelona, Portugal, Congo, Nigeria, Italia, Alemania, Belgika, Hawai, Noruega, Errusia... Une honetan, Euskal Herrian bezala; Kroazia, Eslobenia, Palestina, Uruguai, Hong Kong, Atoarean (Zelanda Berria) ari gara Indymedia proiektuak martxan jartzen
Indymedia Euskal Herria proiektuaren hastapenak Leioako Hackmeeting-ean aurkeztu ziren pasa den urteko urrian. Bertan lehendabiziko asanblada egin zen Indymedia Euskal Herria ekimeneko helburuak ezarriz:
-Euskal Herrian jorratutako informazio alternatiboa eta horizontala lantzeko tresna bat sortzea interneten, eraldaketa sozialaren alde eta autodeterminazioaren alde zabalik dauden prozesuak laguntzeko. -Herri eta gizarte mugimenduentzat erreferentea izatea informazioa lortzeko orduan. -Errealitate soziopolitikoaren inguruko hausnarketentzat erreferentea izatea, beste komunikabideetan lekurik ez duten ahots kritikoek eta disidenteek egunero planteatzen dituzten hausnarketei lekua eskainiz. -Herri eta gizarte mugimenduek sortutako informazioa zabaltzea. -Informazioaren elkartrukea eta interesa duten gaiei buruzko eztabaidak erraztea. -Euskal Herriaren egoera zintzotasunez kanpora zabaldu. -Euskarak interneten duen presentzia areagotzea -Komunikazio horizontaleko tresnak garatzea. -Globalizazioaren kontrako borrokei babes independientea ematea. -Euskal Herriko herri eta gizarte mugimendua eta nazioarteko mugimendu aurrerakoien arteko lotura izatea.
Indymediako guneak osatzeko, teknikoki, software librea eta kode irekiak erabiltzen dira. Indymediak Active software-a erabiltzen du. Programazio hau Australiako informatikari batzuen lana da, eta herri mugimenduentzako aproposa da. Software hau doakoa da. Indymedia Euskal Herriak Indymedia Globaleko printzipioak onartzen dituenean, eta bere sorrerako printzipioak sarean argitaratzen dituenean, Indymedia zentralak helbide elektroniko propioa emango dio. Bide luzea gelditzen zaigu oraindik. Laguntza ezinbestekoa zaigu, bai kolektiboengandik zein hiritarrengandik. Bakoitzak bere herritik edota bere auzotik parte har dezake proiektu honetan. izan untsa, eta parte hartu!
Erantzunak
> * Euskaraz, gaztelaniaz, frantsesez?
Euskara, gaztelania eta frantsesa dira euskaldunok kalean erabiltzen ditugun hizkuntzetarik nagusiak. Eta Indymedia Euskal Herriak hirurak erabiltzeko xedearekin sortu da. Horretan gainera, plurilinguismo proposamen bat daroagu Berlingo bilerara. Sorreratik, euskara eta gaztelaniaz funtzionatzen du, bere foroetan, eztabaidetan... eta frantsesa be egokitu da jada. Itzultzaileak ez ezik, ipar Euskal Herriko ajenteak ere gehitzen ari dira Indymedia proiektura.
Horrez gain, ingelesera itzuliko ditugu sortzen ditugun albiste gehienak. Interneteko hizkuntza globala hori delakoan. Beraz, helburua 4 hizkuntzekin lan egitea da. Eta laguntza guztiak ondo etorriko dira, gomitatuak zarete oro.
> * Helbidea
Oraindik erabaki barik dago. Euskal Herria garrantzitsua litzateke batez ere gure nortasuna eta inguruari begira.
Indymediaren indarra nazioartekotzan ere bada, eta basque bezalako berbek sekulako indarra dute. Eragin aldetik erran nahi baita. Eztabaidan gaude.
>
> * finantziazioa?
Autogestioa, autogestioa eta autogestioa. Hori zer den, nork bere burua finantziatzea. Onartzen dira laguntzak, ez ordea menpekotasunak. Ez da instituzio, alderdi edota ezeren menpeko gunea izango. Bai ordea fundazioek, -BETIKO kasu- lagundutako ekimena. Irrati libreek, mugimendu sozialek, komunikadoreek parte hartuko dute, eta informazioaren komertzializazioaren kontra dagoen neurrian indymedia, erabat independientea izango da. Horrela suertatzen ari da mundu zabalean sikiera.
> Nora? Non apuntatzen da bat? Elektronikoki elkartzen zarete? Fisikoki? Klandestinoki?
Elektronikoki asko aurreratzen ahal da, eta etengabeko eztabaida bizi da. Indymediak mundu mailan foro asko ditu eta hoietan partehartzea nahitanahiezkoa da, eta foro lokalak ere badaude, indymedia euskal herria-lakoak.
Eztabaida eta bilera publikoak ere badira, datorren zapatuan burutuko da bat, Komite Internazionalistak erakundeak Donostiako Egia auzoan duen egoitzan. Gomitatuak zarete, horra ere.
Jakinminez, eta ez inori hatzamarra begian sartzeko gogoz:
Beste alde batetik, Leioako Hackmeeting haren beste emaitza baten berri izan dut. Hack-Lab edo informatikari talde bat sortu dela, Metabolik BioHacklab izen kuriosoarekin (bizkaierea?). Printzipioz, posta zerrenda bat sortu ei dute.
Gainerakoan: Animo Indymedia EH!