Teknologia albisteak

Bilbohiria.com irratia entzuteko beste era bat

Erabiltzailearen aurpegia
patxi gaztelumendi - irratia.com
2006-03-03 : 12:03

Bilbon ez dela euskararik entzuten? galdetu da bazterrotan. Itauna baino gehiago arrangura eragiten duen galdera izan daiteke, baieztapen bat ezezka... Ez dakit nik, baina kezka eragin duelakoan nago. Tira, kanpaina bat izan da....

Baina Bilbo Hiria Irratian euskaraz dihardugu 50 lagunek edo -esatari, teknikari, irratsaioetako kide, aditu, kolaboratzaile-, gure hirian ditugun 55.000 euskaldunen belarrietara heltzeko xedez. Eta orain, Bilboko euskaldunak ez ezik, ostantzekoek ere entzun dezakete Bilbo Hiria irratiko edozein programa, irratiaren berri eduki, elkarrizketak berriz entzun edota irratiaren eguneroko martxan parte hartu; blogean idatziz, erantzunak emanez edo galdera berriak planteatuz.

Irratigintza berria | Irratia 2.0
Eta hori du bilbohiria.com gune berriak: irratia sortzeko modu berria markatuko du, irratigintza euskaldunean eredu bilakatuko da. Irrati txikia da Bilbokoa, baina eremu handia hartzen du bere antenak. Hiria eta inguruko eskualdeak hartzen ditu FMko 96.0ak. Eta orain, Internetetik hedatu egin da emankizunen estaldura, kobertura.... Interneten egotea baino, Interneten lan egitea izango du ezaugarri gune honek, irratiak. Interneteko logikan, entzuleen partehartzea bultzatuz, kanpoan, eremuz kanpo daudenak erakarriz, ordutegiaren logikatik at, irratigintza garaikidean urrats handia eman berri du Bilbo Hiriak. Eta adibide hau ez da soilik beste webgune euskaldun bat, ez, gehiago da, irratia egiteko modu berria da duda barik.

irratia.com auzolanean

Eta gu, Jabi Zabala eta biok, oso pozik gaude. Duela 5 urte hasitako bidean, ikusten dugu Euskal Herrian jauzi txikiak ematen ari direla. Hala Bedi irratiak, Gasteiztik, ematen dituen urratsak jarraitzen ditugu. Asko poztu gaitu Hazparnen basqueradio.com sortu izanak eta berriki sortutako Info7ren eredua irrati nazionaletik haratago doa, zorionez.

Eta pozik gaude, orain ere, emankizun bat egitetik, irrati eredu bat planteatzera jo dugulako Bilbon, auzolanean. Jabiren esku utzi dute Internet ereduaren ardura, eta asmatu du; diseinu polita, argia, interfaze erakargarria eta eduki mordo bat sartu dituztelako -saio guztien berri, etiketak, grabatutako ekoizpen ezberdinak-, irratigintza garaikide bat planteatuz. Auzolanean egindako emaitza da hau, eta ordu asko sartu dituzte irratiko kideek ere, lan egiteko moldeak aldatu eta egokituz, sarearen logika barneratuta. Teknikariak, irratiko arduradunak, albistegietako lagunak, kordinatzaileak.... denak ari dira bilbohiria.com honen ereduari auspoa ematen.

Bilbohiria.com webgune bat baino zerbait gehiago da, benetan, eta harrokeriarik gabe esan dezakegu, une honetan Interneten dagoen euskarazko irratirik txukunena agertzen zaigula pantailan. Irratia sortzeko beste era bat, eta batez ere entzuteko modu berri, erraz eta atsegin bat.

Ezaugarriak

Irrati bitakora> wordpress 2.0 software librearekin
Diseinu grafikoa> Beñat Urbeltz (at0an)
Edukiak > Bilbo Hiria irratiko kazetariak (Migeltxo Monfort, Xabier Monasterio)
Audio teknikariak > Ekaitz Hernandez eta Ibon Burgoa
Blogaren kudeaketa orokorra (admin) > Jabi Zabala (sarean.com | irratia.com)

Erantzun

Twitter ikonoa  Facebook ikonoa  Sartu

Publizitatea

Jarraitu sustatu.eus

E-postaz, mezuz mezu:

E-postaz, eguneko buletina:

  • rss ikonoa

»» Aukera gehiago