Hedabide digitalen komentario sistemetan badago zer hobetu (Sustatuko aldaketen inguruan)

Informazio eta eztabaida gune nagusiak egunkarien webguneak dira, eta anonimotasun hutsean pilatutako gorotz metaketa bihurtu dira. Bai Vocento taldean zein El Pais-en Eskup plataformarekin, erregistro beharra ezarri zuten komentatzeko, baina emaitza berdin berdina da: kaka anonimoa.

Baliorik gabeko eduki nahaspila horrekin zapuztu dira medio asko, eta Estatu Batuetan gehienek komentarioak "kanpora atera" edo externalizatu egin dituzte, beste barik.

Bi modutan egin dute iruzkinen outsourcing hori Estatu Batuetan:

Facebook erabilita batzuek. Bi adibide:

• Techcrunch
• Politico

Eta Disqus sistema apur bat zabalagora joz beste batzuek. Beste bi adibide:

• Poynter
• AllThingsD

Javascript sistemak dira biak, edukia ez da indexatzen... login sistema externoak dira, ez integratuak webgunearen datubasearekin, nahiz eta Disqus-ek extra batzuk badituen hedabideentzat onak

Baina beste batzuk ez dira konformatzen egoera horrekin, eta aldaketak badatoz. Albiste honetan kontatzen denez Gawker hasi da proiektu tekniko interesgarri batekin (Berezitutako blog edo hedabide digitalak idazten dituen enpresa da Gawker). Sistema konplikatu bat da, ez da erraz ulertzen interfazea, baina nonbait erantzun interesgarrienak igartzeko metodo bat daukate.

Hemen ikus daiteke, adibidez (baina bueno, Javascrip bidezkoa da hori ere, eta edukiaren aldetik ez da gehien gustatzen zaidana)

Beste ekimen interesgarri bat webgune honetan egin dutena.

Iruzkinak utzi daitezke, ez bakarrik artikulu osoan, baizik eta parrafo zehatzean. Hala ere, oso argia ere ez da, eta instrukzioak behar dira.

Guk ere pentsatu izan dugu komentario sistemen gauza honetan. Uztarria hedabide lokalean, eta Sustatu apur bat zabalagoan, sistema misto bat ezarri dugu: erregistro propioa, baina baita sarearekin ere. Uztarriakoa izan zen lehen saioa, martxoan, eta han jendeak batez ere e-posta bidezko erregistroak egin ditu, eta asko anonimo antzekoak dira,herriko eztabaida sutsuetan sartzen diren erabiltzaileenak. Hala ere, anonimoak izan arren, profil orrian iritzien historiko bat agertzen du erabiltzaileak, eta horrek badu bere balioa.

Uztarriako esperientzia hori baliatu dugu Sustatun, erregistro soziala (Twitter eta Facebook bidezkoa) gehiago nabarmentzeko, eta era berean beste webgune baten inspirazioa ere izan dugu tartean, The Verge albistegi interesgarria. The Verge-n, komentarioak daude profilekin lotuta, Uztarrian eta orain Sustatun bezala.

Erantzutean mezua sareetan zabaltzeko aukerak ere gehitu ditugu, erantzunek eragin biralagoa izan dezaten. Pertsona ez anonimoek zirkulu sozial-pertsonal propioetan zabaltzen dute komentarioen eragina, modu identifikatuan... Hori ere aurrerakuntza bat da.

Django azpiegituran egindako berrikuntzarekin, profil-erregistro-komentarioen arteko lotura hau are gehiago garatzea espero dugu. Sistema moderatu gabe, irekian eduki ahal izateko moduko neurria dugu (ez gara hedabide miliotsu bat bezain masiboak), baina teknikoki ere Sustatun anonimotasunaren gutxitze bat bultza daitekeela uste dugu, komentarioen kalitatea handituz. Eta uztail hasieratik dauzkagun iruzkinetan halako zerbait nabaritzen dela uste dugu.

Artikulu hau Sustatu.com-en azpiegitura teknikoa egin duen CodeSyntax enpresaren blogean ere argitaratu dut.