Hegoaldeko nerabeentzat sare sozialetarako debekua (16 urterekin)

Frantziako estatukoa proiektu legegilea da eta laster onar liteke Senatuan. Espainiakoa, oraingoz, Sanchezen iragarpen bat da, eta ezaguna da efektu-kolpeak ematen oso ona dela burukide sozialista. Aldi berean, nazioarteko agerpenetan Elon Musk-en antagonista nabarmen bezala geratzen ari da Sanchez, Muskek berak amuari kosk egiten diolarik, eta honek balio propagandistiko PSOErentzat ona duela pentsa liteke (Musk Macronekin ere haserretu da bestalde, Frantzian X/Twitterren kontrako erregistroak izan direlako eta Musk bera deitu dutelako deklaratzera Parisera).

Dubai egindako bilkura batean izan zen, eta "sare sozialen arriskuen" inguruan oro har hizketan, neurri posible hauek iragarri zituen:

• 16 urte izan behar gutxienez sare sozialak erabiltzeko.
• Sare sozial eta Interneteko zerbitzuen exekutibo eta zuzendariak erantzule izatea legez kanpoko eta gorrotozko edukien agerpenaren kasuan.
• Algoritmo manipulazioa zigortu, "burujabetasun digitala" kanpoko esku-hartzeen aurrean arriskuan jartzen denean.
• "Gorroto" eta "polarizazio" zantzuak arakatu, koantifikatu eta jarraitzeko sistema baten ezarpena.

Azken bi puntuak oso lausoak dira, bigarrenak legearen aldetik idazketa konplikatua izan dezake. Lehena da, nerabeen adinarena, Australia eta Frantziako ekimenekin lotzen dena, baina oraingoz detailerik ez da jakiten. Sanchezek hori bota ondoren, Ernest Urtasun Kultura ministroari galdetu zioten, eta ez zuen ezer argirik gehitu, ezer aurreratu nahi ez zuelako edo akaso ezer ez zekielako.

Frantziako kasuan, gainera, Sanchezek aipatu ez duen kontu bat dago: bigarren hezkuntzako ikastetxeetan mugikorrak murriztea.

Eta beste desberdintasun bat, oposizioaren erantzuna. France Insoumise ezkertiarra azaldu da Macronen proiektuaren kontra Frantzian, eta Espainian aldiz Vox ultraeskuindarra agertu da zeharo kontra.

Sanchezen Dubaiko iragarpenen berri, adibidez hemen.