Elon Musken adimen artifizialeko markak: Grok eta xAI

Batetik, albiste arraro samar bat gertatu zen joan den asteburuan: xAI-k erosi egin zuela X, hau da Twitter. xAI-ren jabea Elon Musk bera da (Tesla eta Spacexen jabe den bezala) eta xAi da adimen artifiziala lantzea helburu duen ingeniaritza-enpresa. Hortaz berea den gauza berea den beste gauza bati saltzea Muskek... kontabilitate kontua izan daiteke. Edo beste zerbait (beherago analisi sakonagoa). Beste gaia da Twitter/X-ren barruan Grok tresna lortzen ari den espazio nabarmena. Jarraian, gai honi helduko diogu lehenbizi.

Grok nola dabilen

Grok da, Twitterren xAI-ren inteligentziak jarri duen alderdi publikoa. Hor egon da AA aukera hau Twitterreko web interfazeko albo-barran zenbait hilabetez, baina oraintsu indartu egin dute bere presentzia, logo berri bat jarri, eta Whatsappean Meta AI delakoarekin egin bezala, txateatzeko edo interakziorako aukera zuzen bezala planteatu dute, aski delarik @grok aipatzea txio batean, sistemak erantzuteko.

Beste AA sistemek ohitu gaituzten bezala, Grokek euskara ulertzen du, eta egin ere bai, txukun erantzuten dizu. Urtzi Urkizu Berriako kazetariak egin dizkio zenbait galdera Groki azken egunetan, eta ez bakarrik euskara on samarrarekin, zentzuzko gauzekin erantzuten du Musken agintepeko AAk. (Klika behean reply edo erantzunean ikusteko zer erantzun dion Urkizuri).

Kaixo! Euskarazko prentsaren etorkizuna ziurgabea da, baina hazkunde digitala espero da, hizkuntza biziberritzeari esker. Erronkak: hizkuntza nagusien lehiaz eta diru-sostengua. Aukerak: online plataformak. 800,000 euskaldun inguru daude, eta Berria egunkariak, 2003tik,…

— Grok (@grok) March 28, 2025

Beste batzuk hasi dira erabiltzen Grok galdera deserosoak egiteko eta... Elon Musk-en jokabideaz edo albiste manipulazio trumpistaz galdetuta, Grok ez da lerratzen (dirudienez) trumpismoarekin, eta ikuspegi kritiko zuzena eman ohi du.

Beste adibide hau aurkitu dugu, gazteleraz galdetuta, baina ez espainolismoarekin lerratuta, baizik eta ikuspegi soziolinguistiko errealista samar batekin.

Beste AA batekin ere ikusi genuen, Deepseek-en zer analisi egin zuen Kike Amonarriz soziolinguistak, AA hura ez bakarrik agertzen zela ondo bideratuta analisi soziolinguistikoan, euskaltzalea ere bazela neurri handi batean.

Azken batean, sistema hauek zer irakurriko, horrekin eraikitzen dituzte erantzunak: "testu prediktibo" aurreratu samar bat dira. Euskal soziolinguistikaz zera eta bestea esaten jardun badugu hainbat urtean han-hemenka, eta esan dugun gure jardun digital guztia kopiatu dutenez AA hauek, ba erantzunak eta ustezko jakintza molde horretatik doa. Era berean, sistemak erabiltzailearen pentsakeraren bat egiteko joera izan dezake, eta gutako bakoitzari dagokigun bazka ematen digu.

Groki buruzko beste pistatxo bat: atzo erakutsi genizkizuen meme-irudiak bere bidez sortu genituen.

xAI zertan den

Eta beste kontura itzuliz, nola X/Twitter den orain xAI-ren parte, enpresa handiago baten adar bat. Kontabilitate kontuaz gain, Elon Musk-ek negozioa egiteko aukera ere izan dezake hor, aukera erraldoia ere, Donald Trumpen gobernuan sartu den bezala sartuta.

DOGE izeneko gobernu sail paraleloaren buru da Musk (oraingoz, goian aipaturiko zurrumurruak gora-behera). Gobernu efizientziaren izenean, hor ari da eskua sartzen AEBetako administrazioaren hainbat alorretan. Langileak bota, politika edo zerbitzu 'woke' edo haientzat deserosoak zentsuratu, desegin edo indarrik gabe utzi... Fase horretan aritu dira azken asteetan. Baina hurrengo fasea zein izango den ere iragarri dute askok: Adimen artifiziala masiboki eta brutalki integratu administrazio prozesuetan. Hor zerbitzu-emaile nagusi bezala xAI kokatzen badu Muskek, a ze pagotxa, zenbat milaka milioi sartuko ote zaizkion patrikan! Baita kargutik aldenduko balitz ere, hazia ereinda utzi du administrazioan, uzta biltzeko geroago. 

Adibidez, esan dutenez, AA aplikatuko den esparru bat izan daiteke Estatu Batuetarako bisa nahi duten ikasleen eskaerak prozesatzea (horretan dabiltzala ematen du). Baten bati esleitu behar bazaio zerbitzua, xAIk erraz egingo du hori. Izatez, erabiltzaile profil batean ikusten baduzu X.com webgunean, hala nola Kike Amonarrizen profil honetan, klikatzen ahal duzu Groken ikonoan, eta gure lagunaren profilaren analisi bat emango dizu.

Are gehiago, Amonarrizek Donald Trumpi buruz zer esan duen ere nabarmentzen digu Grokek.

Eta euskaraz agertzen den arren, eska diezaiokezu ingelesera itzultzeko.

Alegia, xAIk prozesatuko balu Kike Amonarrizen bisa eskaera... ea zer gertatuko zen. Ohartxoa: Amonarrizen profil-analisi hau bere 100 txio berrienekin egin omen du Grokek; profil osoaren analisia ere egiten dutela pentsa daiteke, milaka txiorena. Eta profila ezabatu baduzu, gordeko zuten segurtasun kopiaren bat, ezta?