Mario sagako Nintendoren joko onena, Kart 8 Deluxe, euskaratuta
Game Erauntsia jokalari elkarteak Mario Kart 8 Deluxe lasterketa-jokoa euskaratu du. Mario pertsonaiaren bigarren jokoa da euskaraz duguna (bueno, testuan azaldutako xehetasunekin 3.a ere esan daiteke), Super Mario Bros 2 2020an euskaratu baitzen. Bada aldea bien artean, orduan euskaratutako 1988ko sistema baterako eta estetika batekin egina zen; joko berria 2014koa da eta 2017ko bertsio bat da euskaratu dena, eta Game Erauntsiaren arabera, gainera, Marioren sagako 30 urtetako produktu txukunena da. Mario Kart 8 Deluxe Nintendo Switch makinan joka daiteke, edo ordenagailu batean emulatzaileen bidez.
Menuetako testuak, hainbat irudi eta testura, lasterketak jokatzerakoan agertzen diren “Hasi!” edo “Zorte Txarra!” bezalako testuekin, eta beste hainbat elementuren itzulpena gauzatu, eta gero horiek jokoan sartu dituzte. Horretarako, kanpoko laguntza izan dute Game Erauntsikoek: Mario Kart Translation Project-eko Atlas kidearen laguntza ezinbestekoa izan da irudi berriak sortzerako orduan.
Era berean, duela aste batzuetako beste euskaratze bat ere lagungarri izan da proiekturako, Doremi euskal gamerrak euskaratutako Mario Kart Wii tarteko proiektua.
Mario Kart 8 Deluxe euskaraz jokatzeko, dela Switcharekin edo Yuzu eta Ryujinx emulatzaileetan, jaitsi beharreko fitxategiak eta instalatzeko instrukzioak hemen.
Euskaratutako bideojokoen katalogoak aurrera jarraitzen du, eta hemen du bilduma Game Erauntsiak.
Ikus gameplay hau joko euskaratuarekin:
Erantzun
Sartu