Teknologia albisteak

Fedibertsoaren hazkundea agerikoa da

Sustatu

2021-01-07 : 15:52

Azken asteetan eman dugu Fedibertso delako azpiegitura eran antolatu diren webgune euskaldun pare baten berri: Lemmy eta Baleafunk (albisteak Sustatun: batarena eta bestearena). Berrikiago, Lemmyko hari batean ikusi dugu nolakoa hazkundea ari diren izaten zerbitzu hauek Interneten. 2021.a izan daiteke fedibertsoaren urtea agian.

Fedibertsoa osatzen dute software libreko garapen batzuek, funtzio desberdin baina erlazionatuekin: komunikazio eta informazioa, saretze soziala eta interesen araberako antolakuntza, edukien biltegi eta banaketa plataforma... Baina software instantzia bakoitzak, nodo indibidual eran funtziona dezake, edo paraleloan instantzia askotan. Mastodon bada Twitterren klona fedibertso munduan, ez da instantzia bakarra, Mastodon instantzia mordoa daude, eta euskarazkoak, bi hain zuzen ere.

Izena datorkio terminoari federazio + unibertso terminoen batuketatik, zeina berdintsua da ingelesez: (federation + universe = fediverse). Hala ere, euskaraz beste doinu bat ere hartzen du nahigabean, fede eta dibertso hitzak ere gogora datozigulako askori.

Euskal fedibertsoa osatzen duten webguneak ondokoak dira oraingoz:

Webgunea	Softwarea	Eduki-mota	Izen emate irekia
baleafunk.eus	Funkwhale	Audioak	Bai
lemmy.eus	Lemmy	Foroak	Bai
mastodon.eus	Mastodon	Mikroblogak	Bai
mastodon.jalgi.eus	Mastodon	Mikroblogak	Bai
peertube.euskarabildua.eus	Peertube	Bideoak	Ez
pixelfed.eus	Pixelfed	Argazkiak	Bai

Peertube ez dirudi martxan dagoenik hau idazten dugun unean, eta Pixelfed sarbide baten atzean dagoela ematen du... dena dela, 2021a hasteko bada sorta interesgarri bat.

Eta Euskal Herrian hastapenetan dena, goraka doa mundu mailan. Hona zenbait plataformaren hazkundea 2020an zehar, Lemmyko bilduma horretatik atera duguna.