Udan EAEn izango diren kultura ekitaldiekin osatutako mapa sarean
Udan festarik festa ibili nahi baduzu, tresna interesgarria duzu Belen Saez CleverMaps enpresako kideak sortu duena: mapa bat osatu du EAEko kultura ekitaldiekin, Kulturklik webguneko APIan oinarrituz. Nahi duzun data aukeratu, eta webguneak egun horretan ekimenak dauden herri guztiak erakutsiko dizkizu. Gainean klik eginez gero, zer dagoen ikusiko duzu, baita lotura bat ekitaldiaren inguruko informazio gehiago eskuratzeko ere.
Argazkiak.org | Udako ekitaldien mapa © cc-by-sa: sustatu
Festarik ezagunenak klasifikatuta ditugu gure buruan inongo egutegiren beharrik gabe, baina ekitaldi ezberdinen berri emango digun tresna edukitzea ez dator gaizki. Hori egin du Belen Saezek, eta hemen klik eginez kontsulta dezakezu. Webgunea gaztelaniaz zabaltzen da defektuz, baina euskarara aldatu daiteke.
Open Data Euskadi ekimenaren parte da honakoa, eta horregatik, kode guztia eskuragarri dago nahi duenarentzat. Hemen aurkituko dituzu xehetasun gehiago, Belen Saezek berak azalduta.
Erantzunak
Haiek nahi duten jardunaldiak agertzen dira, ud4kamp sartzeko proposatu genien eta ezetza jaso dugu ;-)
Argumentatu gabe gainera:
Dabid Martinez,
Kulturklikeko lantaldeak 2012-06-24 egunean bidalitako informazioa (edukia/ezagutza/albistea) ez argitaratzea erabaki duela jakinarazten dizu.
Nahi izanez gero, beste informazioren bat (edukia/ezagutza/albistea) bidal dezakezu.
Eskerrik asko zure ekarpenarengatik.
Kulturklik
Hasteko zorionak Belen Saezi egindako lanagatik, eta hobetzeko proposamen txiki bat dut: "sortu zure agenda ataka" leihoan, hizkuntza aukera txertatzeko konfigurazioan.
Izan ere, "euskaraz" "erdaraz" "euskaraz eta erdaraz" diren ekitaldiak bereiztea oso interesgarria izan daiteke euskarazko ekitaldien agenda sortu ahal izateko.
Mila esker!!