Teknologia albisteak

Sormenaldia 2026: Lekeition eta Markina-Xemeinen euskal kulturaren adierazpide ezberdinak ikusgai

Loraldia

gaur : 09:50

Lau urtez Loraldiak antolatuta Lekeition burutu izan den euskal kulturaren emanaldien zikloa, aurten Sormenaldia bilakatu da eta Markina-Xemein batu da ekimenera. Bi herri, bi aste, olatu bera: Lekeition ekainaren 24tik 26ra eta Markina-Xemeinen uztailaren 1etik 3ra, musika, literatura, bertsolaritza, zinema eta performanceak uztartuz, programazio anitza eskainiko da. Markina-Xemein gehitzen da beraz: hiru eguneko programazio propioarekin, Ipar haizea/Zuberoa ardatz, Mixel Etxekopar eta Maddi Oihenart bezalako proposamenekin. Loraldia Plaza lerroaren apustua: sorkuntza garaikidea arnasguneetan errotu, transmisioa eta komunitatea indartu, eta “olatu berri bat” kultur eremuan utzi.

Sormenaldia 2026 Loraldia Plazaren baitan kokatzen den proposamena da, eta aurten jauzi kualitatiboa emango du: Lekeition errotutako ibilbideari Markina-Xemein gehituta, bi herrietan sei eguneko kultur-programazio trinkoa eskainiko da.

Duela lau urte Loraldiak antolatutako Lekeitioko Sormen Astea errotu zen, eta ordutik “alez ale, hostoz hosto” ari da sorkuntza sustatzen kostaldeko herrian; arnasgune bat da itsaso ondoko plaza horretan. 2026ko edizioak ideia hori indartzen du: euskal kulturaren eragile askok “olatu berri bat” eskatzen duten garaian, Loraldiak kultur eremuan lorratza utzi nahi du, bere balioen inguruan: plaza-formatuak, transmisioa eta publiko berriak. Sormenaldia 2026k argi erakusten du Loraldia Plazaren estrategia: euskal kultura garaikidea tokiko arnasguneetan errotu, diziplinen arteko zubiak eraiki, eta publikoari esperientzia hurbilak eskaintzea. Lekeitioko “olatu berria” eta Markina-Xemeingo “ipar haizeak” irudiek norabide bera markatzen dute: sorkuntza garaikidea, transmisioa eta komunitatea.

Ekainaren 24tik 26ra bitartean burutuko da Lekeition; eta uztailaren 1etik 3ra Markina-Xemeinera egingo du jauzia. Aurten lehen aldiz Markina-Xemein: hiru egun, Ipar haizeak eta Zuberoa iparrorratz.

Sormenaldia 2026ren berritasun estrategiko nagusia da Markina-Xemein programazioan sartzen dela, uztailaren 1etik 3ra bitarteko hiru kultur proposamenekin. Lekeitiotik Markina-Xemeinera mugitzean “Ipar haizeak” joko du, eta Zuberoa izango da iparrorratza: dantza, musika eta sorkuntza garaikidearen bidez. Sormenaldia 2026k diziplina ugari bilduko ditu: musika, teatroa, bertsolaritza, literatura, zinema, performancea eta dantza tailerra.

Egitaraua: Lekeitio (ekainak 24-26)

Ekainak 24 (asteazkena) - HEZUR BERRIAK (Ikusgarri Aretoa, 20:00): bertsolaritza eta musika (70 min). Ane Labakaren poema-testuen irakurketa musikatuak eta bat-bateko bertsoaldiak tartekatuko dira; musikaz Ines Osinaga, eta bertsoetan Uxue Alberdi eta Onintza Enbeita. Emanaldiaren ostean solasaldia sortzaileekin.
Ekainak 25 (osteguna) - IPUIN BAT KANTATUA (Azkue Aretoa, 19:00): musika eta literatura (60 min). Eider Rodriguezek aukeratutako ipuin baten irakurraldia eta Anariren kanten hautaketa, narrazioaren barrutik kantatuta. Emanaldiaren ostean solasaldia sortzaileekin.
Ekainak 26 (ostirala) - ANTON ABADIA. Dublinetik Hendaiara (Ikusgarri Aretoa, 20:00): musika eta teatroa (60 min). Anton Abadiaren bizitza “ezinezko”aren kontaketa; bakarrizketa (Anje Oregiren eskutik) eta zuzeneko soinu-banda (Xabi Zeberio eta Mixel Ducau), eta Alaia Phillipsen ahotsa. Loraldiaren produkzioa da. Emanaldian solasaldi laburra sortzailearekin.

Egitaraua: Markina-Xemein (uztailak 1-3)

Uztailak 1 (asteazkena) - ZUBEROAKO DANTZA TAILERRA (Mixel Etxekopar) (Uhagon Kulturgunea, 18:30): transmisio tailerra (120 min). Zuberoako jauziak eta melodiak ezagutzeko eta lantzeko saioa.
Uztailak 2 (osteguna) - “XIBEROA KANTUZ LORATURIK. TXORIEKIN HIZKETAN” film laburra (Uhagon Kulturgunea, 19:30): zinema eta solasaldia (30 min + 15 min). Sormen prozesuaren ikus-entzunezko begirada eta lekukotza gisa aurkeztuta.
Uztailak 2 (osteguna) - MIXEL ETXEKOPAR performance musikatua (Uhagon Kulturgunea, 20:30): performance musikatua (50 min). Sorkuntza “mugarik gabea”, inprobisazioa eta esplorazioa ardatz.
Uztailak 3 (ostirala) - LUR. Maddi Oihenart eta Juantxo Zeberio (Uhagon Kulturgunea, 20:00): musika (80 min). Proiektu intimo eta hunkigarria, kantu berriekin eta testu/poesia loturekin.

Sarrerak

Programazio anitza honetan badaude hamaika aukera. Ekintza batzuen sarrera doakoa da eta beste zenbaitetan aurretiaz sarrera atera behar da. Lorazainek, Loraldiaren komunitateko kideek, deskontuak izango dituzte sarreren erosketan.

Sarrerek 5€ eta 10€ arteko kostua daukate eta dagoeneko badaude loraldia.eus webgunean salmentan.

Loraldiak antolatutako ekimena da, Lekeitioko Udalaren, Markina-Xemeingo Udalaren eta Bizkaiko Foru Aldundiaren babesletzarekin, eta NAIZ eta DANOBAT direla laguntzaile.