Elhuyarrek eta Euskaltzaindiak bost urterako lankidetza-hitzarmena sinatu dute

Elhuyarrek eta Euskaltzaindiak bost urterako lankidetza-hitzarmena sinatu dute, Akademiaren egoitzan. Ekitaldian parte hartu dute Itziar Cortés Elhuyarren aldi baterako koordinatzaile nagusiak eta Andres Urrutia euskaltzainburuak. Bi erakundeok bakarka egiten duten lanen osagarritasuna, elkarrekikotasuna eta sinergiak ehuntzea dira lankidetzaren ardatz nagusiak.

Besteak beste, Euskaltzaindiak euskararen batasunean eman dituen arauak, gomendioak eta irizpenak hedatzeko, hiztegigintza aberasteko eta zientzia eta teknikaren alorrean euskararen erabilera normalizatzeko lankidetzan aritu dira bi erakundeak. Orain, lankidetza hori areagotu nahi dute, hitzarmenaren bitartez.

Hauek dira bi erakundeon arteko elkarlanerako eremuak:

• Lexikografiaren alorrean: euskararen corpusa ikertzeko, zabaltzeko, eguneratzeko, mantentzeko, euskara oraindik erabili gabe dagoen eremuetara eramateko, gizarteratzeko eta erabiltzaileen beharretara egokitzeko egitasmoen inguruabarrean jardungo dute bi-biek etorkizunean.
• Euskararen batasunaren eremuan, pilaturiko eta arian-arian ondutako ezagutzaren transferentzian jardungo dute: ikastaro, argitalpen, artikulu -nazioartekotzea indartuz-, txosten tekniko zein bestelakoen bidez.
• Halaber, ingurune digitalean euskararen erabilera jasoa sustatzeko produktuak eta egitasmoak, ekimenak eta jarduerak partekatu eta antolatuko dituzte.
• Ikerketa sustatzen ahaleginduko dira (argitalpenak, ikerketa-bekak, graduondoko lanak, doktoretza-tesiak eta abar) eta euskararen ikerketan eta sustapenean eginiko lanak zein ibilbideak aitortuko (sariak, monografiak eta abar) dituzte.