CAF-Elhuyar sariketan parte hartzeko epea uztailaren 1ean amaitzen da

Zientzia eta teknologiaren arloko gaiak eta ikerketak euskaraz gizarteratzeko lanak aitortzea eta bultzatzea du helburu CAF-Elhuyar sariketak. Begi berriz kontatzeko  da aurtengo goiburua, eta uztailaren 1a arte izango da lanak aurkezteko aukera, honako helbide honetan: cafelhuyarsariak.elhuyar.eus 

Sariketa Elhuyarrek antolatzen du, CAF enpresarekin batera eta NEIKERen babesarekin, eta kategoria hauek osatzen dute:

• Dibulgazio-artikuluak. Euskaraz sortutako dibulgazio-lanak aurkeztuko dira, zientzia eta teknologiaren arlokoak.
• Orokorrak: zientzia eta teknologiako edozein gairi buruzko dibulgazio-artikuluak.
• Norberaren ikerketan oinarritutako artikuluak: zientziako eta teknologiako norberaren tesietan oinarritutako dibulgazio-lanak edota norbere ikerketari buruzko artikuluak aurkeztuko dira.

Saria: 2.000 euro, oroigarri bat eta Elhuyar aldizkarirako urtebeteko harpidetza.

• Zientzia-kazetaritza. Kategoria honetan, argitaratutako kazetaritza-lanak aurkeztuko dira, bi formatutakoak.
• Idatzizkoak: euskarazko hedabide batean argitaratutako zientzia-kazetaritzako artikuluak.
• Audioak: zientzia eta teknologiako gaiak gizarteratzeko irrati-piezak edo podcast-audioak, euskaraz sortuak.

Saria: 1.000 euro, oroigarri bat eta Elhuyar aldizkarirako urtebeteko harpidetza.

• Argazkilaritza-lanak. Kategoria berri honetara, zientziarekin edota teknologiarekin lotura duten argazkiak aurkeztuko dira. Bi azpikategoria egongo dira:
• Helduak: 18 urtetik gorakoentzat.

Saria: 2.000 euro, oroigarria eta Elhuyar aldizkarirako urtebeteko harpidetza.

• Gazteak: 14-18 urte artekoentzat.

Saria: Zientziarekin edota teknologiarekin zerikusia duen esperientzia batez gozatzeko aukera (1.000 euro inguruko balioa), eta Elhuyar aldizkariaren urtebeteko harpidetza.

Horrez gain, NEIKER saria emango zaio lehen sektoreari lotutako artikulu onenari. Sari hau bateragarria da beste sariekin, eta 2.000 euro, oroigarri bat eta Elhuyar aldizkarirako urtebeteko harpidetza jasoko ditu saridunak.

(Aurreko urteetako lanak cafelhuyarsariak.elhuyar.eus helbidean daude ikusgai).