Teknologia albisteak

Jantzi berriarekin, XV. denboraldiari ekingo dio asteburuan Teknopolis saioak ETBn

Erabiltzailearen aurpegia
2012-10-05 : 12:45

Teknopolis saioaren XV. ekitaldia abian jarriko da asteburu honetan Euskal Telebistan. Teknopolis jantzi berriarekin dator kurtso honetan eta gainera kalera aterako da, hau da, erreportajeen aurkezpen guztiak, Miramoneko platoen erosotasunetik kanpo egingo dira, freskura eta dinamismo bila.  Ordutegian ere aldaketak egon dira, eta hauxe izango dira emisio-orduak: Larunbatean ETB-1en 15:00etan, eta errepikapena astelehenetan Goenkaleren ostean; eta ETB-2n asteazkenetan gaueko 12ak aldera, eta errepikapena, igandeetan goizeko 8:45ean. Sarean ere ikus daiteke, EITB Nahieran gunean eta http://teknopolis.elhuyar.org helbidean.

Zientzia eta teknologia gaiekin lotutako erreportajeak izango dira Teknopolisen oinarria. Monografikoak ere egingo dira urtean zehar, eta, programa berean gai batekin erlazionatutako istorioak ere kontatuko dira. Irudi berriaz gain, bestelako berrikuntzak ere badira denboraldi honetako Teknopolisen: horietako bat, argazki-lehiaketa da. Argazkizaleek zientziarekin eta teknologiaren zerikusia duten argazkiak bidali beharko dituzte Teknopolisen webgune berrira, http://teknopolis.elhuyar.org helbidera. Hilero tableta bat emango zaio epaimahaiak onenentzat jotzen duen argazkiaren egileari.On Zientzia bideo amateurren lehiaketa ere Teknopolisen bideratuko da.

Programa berritzearekin batera, webgunea ere berritu da eta sare sozialetan eragiteko asmoa du lan-taldeak. Bestalde, denboraldi honetan ere Oihana Jauregik aurkeztuko du Teknopolis, eta Beñardo Kortabarriak zuzendu.

Saioaren babesleak hauek izango dira edizio honetan: Mondragon Unibersitatea; Euskal Herriko Unibertsitatea; Nafarroako Unibertsitate Publikoa, CIC bioGUNE, CIC biomaGUNE, CIC nanoGUNE, CIC energiGUNE, CIC tourGUNE, CIC microGUNE, CIC marGUNE; EVE; Eusko Jaurlaritzako Hezkuntza, Unibertsitate eta Ikerketa saila, Ikerbasque eta Eusko Jaurlaritzako Industria, Berrikuntza, Merkataritza eta Turismo Saila.

Erantzun

Twitter ikonoa  Facebook ikonoa  Sartu