Teknologia albisteak

JantziAgain: bigarren eskuko arroparen merkatutxoa eta joste eta jantzigintza tailerrak

Cristina Enea

2013-01-24 : 12:02

Cristina Enea Fundazioak, Tytti Thusberg diseinatzaile finlandiarraren eta Eibarko ALFA firmaren babesarekin, JantziAgain egitasmoa jarri du abian, joste eta jantzigintzaren inguruan interesa duen jendearen topaleku bilakatu nahi duen proiektu berria. Hilabete bakoitzeko azken igandean (lehena urtarrilaren 27an), bigarren eskuko arroparen merkatu txikia eta arropa konpontzeko tailerrak izango dira Cristina Eneako Ingurumen Baliabideen Etxean.

Arropa eta osagarriak partekatzeko, baina baita modari, joskintzari eta gure arropen zaintzari buruzko jakinduria elkartrukatzeko topagune bezala sortu da JantziAgain. Erabilitako arropari partekaturiko ezagutzaren eta ospakizun kolektiboaren bidez modu berritzaile batean begiratzea da helburua. JantziAgainek kontsumo arduratsuaren aldeko apustua egiten du herritarren baloreetan eta jarreran aldaketa sustatzeko, erabilitako arropari aukera berria emanez, hondakin bilakatu ordez, berriz ere baliabide izan dadin.

JantziAgainek bi jarduera-esparru ditu, alde batetik bigarren eskuko arropa elkartrukatzeko merkatutxo arautua, eta bestetik josketari eta jantzigintzari buruzko ezaguerak partekatzeko gune iraunkor bat, erabilitako janzkiak konpontzera eta pertsonalizatzera bideratua. Topaketak hilabete bakoitzeko azken igandeetan izango dira Cristina Eneako Ingurumen Baliabideen Etxeko "Kaperan", 10:00etatik 13:00etara.

Elkartruke topagunea

Ekar ezazu zure arropa JantziAgaineko elkartrukerako puntura. Bertan “jantzipuntuak” jasoko dituzu trukean, JantziAgainen edozein saiotan beste arropa batzuk eskuratzeko.

Arroparen puntuazioa

Jantzipuntu 1: arropa sinplea eta kamisetak.
2 jantzipuntu: galtzak, alkandorak, gonak, jertseak eta artilezko arropak.
3 jantzipuntu: berokiak, jakak, konjuntoak, trajeak eta antzekoak.

Gogoratu…

Arropak garbia egon behar du, zulorik edo orbanik gabe.
Gehienez 5 arropa-pieza ekar daitezke pertsona bakoitzeko, saio bakoitzeko.
Janzteko arropa bakarrik onartuko da. Ez da oinetakorik, barruko arroparik edo etxeko arroparik onartuko.
Arropa esekigailuetan egongo da ikusgai, edonork begiratu eta aukera dezan.
Antolakuntzak izango du arropa onartzeko edo ez onartzeko eskumena, bai eta, puntuazioa ezartzeko ere.
Antolakuntzak onartzen ez duen arropa, erabilitako arropen edukiontzietara edo Garbigunera eraman beharko du ekarri duen pertsonak.

Joskintza eta berrerabilpen tailerra

JantziAgainek joskintzari, jantzigintzari, arropen konponketari edota arroparen pertsonalizazioari eskainitako ezaguerak eta jakituria elkartrukatzeko lekua izango ditu. Eremu ireki eta sortzailea, non partehartzaile guztiek beren esperientziak kontatzeko, trukoak eta teknikak erakusteko edota arropari elementu bereizgarriak gehitzeko aukera izango duten, guztia giro atseginean.

JantziAgainek josteko elementuak eta materiala jarriko ditu, baina lanak burutzeko janzkiak norberak ekarri behar ditu. Beharrezkoa da aldez aurretik izena ematea.