Sustatu logoa Teknologia albisteak

Gure kontsumo digitalak: zer jan hura izan

Sustatu
2026-11-22 09:56

UEUren Humanitate Digitalen guneak jardunaldia antolatu du azaroaren 27an Errenterian, goiburu honekin: «Gure kontsumo digitalak (zer jan hura izan)». Euskaldunok sarean ditugun dieta digitalei buruzko hausnarketa, bi ardatzen gainean: euskarazko edukiak eta desinformazioa.

Helburu hauek jarri dituzte antolatzaileek:

  • Euskarazko ikus-entzunezko eduki digitalen panoramika garaikidea ezagutzea.
  • Desinformazio eta negazionismoek inguru digitaletan duten indar eta presentzia ezagutzea.
  • Gure eguneroko kontsumo digitalen inguruan elkarrekin hausnartzea.

Egitaraua, jarraian.

Goizeko saioa, Torrekua espazioan:

  • 09:00 - 09:15 Harrera
  • 09:15 - 09:30 Ongietorria eta jardunaldiaren aurkezpena.
  • 09:30 - 11:00. Lehen blokea: euskarazko edukiak gure kontsumo digitalean. Urtzi Urkizu Adrian (Berriako kazetaria. Streaming Aroa liburuaren egilea.); Xumar Altzugarai (Ikus-entzunezko sortzailea eta Zer Non Ikusi eta Pantailak Euskaraz-eko kidea.). Moderatzaile: Xabier Landabidea Urresti (HDGunea)
  • 11:00 - 11:30. Atsedenaldia.
  • 11:30 - 13:00-. Bigarren blokea: desinformazioa, egia-ostea, negazionismoak eta kazetaritzaren aurkako erasoak. Laida Arbizu Agirre (Filosofoa eta ikertzailea.); Maider Eizmendi Iraola (Kazetaria eta ikertzailea.). Moderatzailea: Ana Galarraga Aiestaran (Elhuyar)
  • 13:00 - 14:00 Itxiera-saioa: aukerak, erronkak, ahultasunak, indarrak. HDGunea, TEKS, Badalab.

14:00 - 15:00 Talde-bazkaria. Badalaben.

Arratsaldeko tailerra, Badalaben.

  • 15:00 - 17:00. Tailerra: Sare sozial libreak komunikazio-estrategian. Zergatik, zertarako eta nola? Mattin Solis (Talaios) eta Leire Lison (Badalab).

Informazio gehiago eta matrikula, hemen.

Jarraitu gaitzazu