Baliatu Googleren "iturburu-hobespenak" algoritmoa pittin bat gobernatzeko
Duela hilabete batzuk Google "prefered sources" edo iturburu hobetsien funtzio batekin probetan hasi zen, baina maiatzean Googlek darabiltzan hizkuntza guztietara zabaldu zuten, euskarari ere bai, eta jada erabil ditzakegu "iturburu-hobespenak" Googlek ematen dizkigun bilaketetan emaitza batzuk aurretik jartzeko promesa batekin.
Googleren iragarpena erdaraz aurkitu dugu hemen, baima euskarazko konfigurazioarekin bazabiltza, zerbitzua bera euskaraz daukazu hemen. Googleren arabera, albiste edo informazio-iturri berrienak moldatzeko balio du zerbitzuak; baina uste dugu teorikoki edozein bilaketa motarako ere praktikoa suerta daitekeela, emaitza berriak berezko algoritmoarekin ere hobesten baititu Googlek (edo bilaketa aurreratuko tresnekin berrienetara murritz daiteke bilaketa bestela).
Irudian erakutsi dugu zer agertzen den hobespen mota horietan, hemen klikatuta alegia: https://www.google.com/preferences/source
Domeinu izen-jakin bat bilatu, eta check eman, hori hobetsia ageri dadin. Ikusten duzuen bezala, Sustatuko editorearen konfigurazioa da irudiak erakusten duena, eta euskarazko iturri batzuk hobetsi ditu, eta Wikipedia orokorra ere bai, baina baita espezifikoki euskarazkoa, eu.wikipedia.org. Editore honek normalean euskarazko bilaketak egiten ditu, eta hortaz, ez da hain nabaria sistemak honek bereizketarik egiten duen horretan, baina kalterik ez behintzat.
Editorea maiatzetik ari da erabiltzen hobespen sorta hau, eta halako diferentzia erradikalik ez, baina nolabaiteko emaitza zehatz batzuen agerpen usuagoa bai, agian badago. Bereziki Wikipedian euskarazko emaitzak gorago agertzea gertatzen dela esango genuke.
Nolanahi ere, gomendagarria hau egitea Google bilatzailearen erabiltzaile bazara. Kalterik ez, eta indibidualki euskaldunok atera dezakegun etekinaz gain, euskal iturri batzuk jende gehiagok jartzen baditu, agian eragin metatu positibo bat euskarazko informazio zuzena irisgarri jartzeko orduan.
Ekin eta probatu hemen: https://www.google.com/preferences/source
Erantzun
Sartu