"Euskaraz bizitzeko behar den dena" eskatzeko Euskaltzaleon Martxa egingo da ekainean

"Euskaraz bizitzeko behar den dena" eskatuko du euskalgintzak ekainaren 13an. Abenduan Bilbon egindako ekitaldiak larrialdi linguistikotik indarraldia igarotzeko premia gizarteratzeko ayolatu zuten, eta "ekaineko hitzordua Pizkunde berri baterako behar ditugun baldintzen aldarrikapenerako gunea izango da", Kontseiluaren iritziz. "Euskaltzaleok antolatzeko beste urrats bat, euskaraz bizitzeko behar den dena eskuratzeko bultzada. Ekainaren 13a larunbata da, eta Iruñeko mobilizazioa arratsaldez egingo da. 17:00etan. Hiru puntu ezberdinetatik hiru zutabe abiatuko dira Gazteluko Plazaraino, hiru aldarrirekin: ofizialtasun osoa, jauzia hizkuntza politiketan eta euskaltzaletasuna.

• Ofizialtasun osoa: Ipar Euskal Herrian koofizialtasuna, Nafarroako euskararen zonifikazioa gainditu eta ofizialtasuna lurralde osora hedatzea, eta Euskal Autonomia Erkidegoan oldarraldiaren ondorioz eragiten ari den desofizializazioaren aurrean euskararen normalizazioa blindatuko duen arkitektura juridiko berri bat.
• Hizkuntza politiketan jauzia eragiteko interpelazioa erakunde, alderdi eta eragile sozialei, euskararen ezagutza orokortuko duten politiken eta erabilera normalerako baldintzak sortuko dituzten neurrien alde.
• Euskaltzaletasunaren ekarpena aldarrikatu, azpimarratu egunerokoan euskaltzale gisa jokatzearen garrantzia eta euskaltzaleak elkarrekin antolatzearen premia.

Euskaltzaleon Martxa prestatzeko eta sustatzeko, materiala eta gidalerroak zabaldu ditu Kontseiluak bere webgunean, hemen.