Carspreading: auto toxikoak, tamainaz handiegiak
Manspreading kontzeptua agian ezagutuko duzue, gizonezko askoren jarrera bat, hankak zabal agertzekoa, espazioa okupatzea eta emakumeak deseroso sentitzeko efektu bikoitza izan duena. Hona beste kontzeptu bat, toxikoa hau ere: Carspreading. Gero eta auto handiago eta bereziki zabalagoak hedatzen direlarik hirietan, horiek okupatzen duten espazioa (hirigintzak erreserbatu behar dien espazioa, alegia) gero eta zabalagoa dela. Toki batzuetan kontrako neurriekin hastekotan dira.
Hemen webgune bat ingelesez carspreading fenomenoaz informatzen duena. Bertatik hartu ditugu gaurko irudiak. Bertan nabarmentzen dituzten kontuen artean:
- SUV edo orotariko auto handi batek, oro har, %20 erregai fosil gastatzen du kilometroko. Manspreading egitea gizonezkoen jarrera toxikoa bada, autoen carspreading-a ere toxikoa da, baina literalki kasu honetan.
- Gidariak aurrean duena ikusteko aukera gutxiago du autoaren muturraren handiagatik, eta ondorioz (Erresuma Batuko ikerketa baten arabera), ume bat harrapatzeko probablitatea hirukoizten da auto arruntago batekin alderatuta.
- Hirigintzako erabakietan, kaleetako autoen marrak, edo parkinetakoak, gero eta zabalago marraztu behar dira eta aparkatzeko zailtasunak areagotzen dituzte, tokiak murriztuz auto arruntagoak dituztenentzat.
- 21. mendean areagotzen eta azkartzen ari den joera da, beheko irudiko neurri ertainek erakusten duten bezala.
Azkenean, autoen zergak udalek kobratzen dituzten kasuan, arautu beharko litzateke auto handiak dituztenek gehiago ordain dezaten zirkulazio zergetan. Neurri batean garestituz auto hauen profila (auskalo funtzionatuko lukeen, luxu eta aberastasunaren ikono baitira, eta hortaz, nahita aberats zarela erakusteko erosten dira), eta bestetik udalek jaso dezaten dirua aparkalekuetako arazoak ahal bada konpentsatzeko.
Halako neurri bat Cardiffko udalean hartu dute, pisuaren araberako parkin-zerga eta baimenak daude:
- Auto elektrikoen kasuan, gehiago ordaindu behar da 2.400 kilotik gora.
- Erregai fosileko autoen kasuan, 2.000 kilotik gora.
- 3.500 kilotik gorako autoek ez dute "erresidentzia baimenik" izango (ez dakigu ondo zer den hori Galesko kontestuan).
Euskal Herriko hirietan azken urte gutxi hauetan motoreen isurien araberako zirkulazio murrizketak ezarri dira. Tamainaren araberakoak ere ezarri beharko lirateke.
Erantzun
Sartu