'Wikipediatik Ikasgelara': irakasleentzako baliabideen katalogo eta gida

EWKEk nabarmentzen duenez, Wikipedia ez da soilik informazio-iturri bat, "ikasleek ezagutza sortzeko, aztertzeko eta partekatzeko espazio kolektiboa ere bada. Ikasleak ez dira edukiaren hartzaile pasibo, baizik eta ezagutza eraikitzen duten partaide aktibo bihurtzen dira."

Hezkuntzaren alorrean hainbat urtez egin du lan EWKEk, eta esperientzia horrek erakusten du Wikipediako proiektuek ikasgelam jaitasun konplexuak garatzeko aukera ematen dutela:

• Pentsamendu kritikoa eta informazioaren analisia.
• Idatzizko adierazpena eta euskararen erabilera egokia.
• Talde-lana eta elkarlana.
• Erantzukizun digitala eta iturri fidagarrien erabilera.

Alderdi konkretuetara etorrita, katalogoak zehatz azaltzen ditu hainbat baliabide:

• Txikipedia, gazteentzako prentsatutako entziklopedia.
• Ikusgela proiektuaren emaitzak, Euskarazko bideo pedagogiko libreak: 10 sail eta 200 bideo baino gehiago, xehe azalduta sail bakoitzaren edukiak eta zioak.
• Wikipedia darabilten ikas-egoerak, Wikikasi deitu duten ekimena. Sei garapen oraingoz, helburu dutenak ikaskuntza esanguratsua sustatzea, benetako arazo edo egoeretatik abiatuta. Baita ere konpetentzia digitala modu integratuan garatzea, maila guztietan: informazioa bilatu, aztertu, antzeman, egiaztatu eta arduraz partekatu.
• Euskal Herriko historia 100 objektutan ekimena, zehazki dituen helburu didaktikoak azalduz.

"Digitalizazio librea euskal hezkuntza askatzeko" izeneko topaketan aurkeztu zuen atzo lan hau EWKEk. Topaketan dei egin zieten irakasleei, ikastetxeei, hezkuntzako eragileei deskargatu dezaten gida hau, eta kontaktatu EWKErekin gehiago lantzeko ikastetxeetara eramateko ideia hauek. 

Interesatuok, beraz, adi baliabide hauei:

• Wikipediatik Ikasgelara dokumentua, 32 orriko liburuzka, hemen.
• Euskarazko Wikipediaren Hezkuntza ataria.