Kantuz eguna Tafallan: Euskal Herria Kantuz mugimendu gero eta hedatuagoaren topaketa

Tafallako bilkuran (11.00etan hastekotan) kantu-liburuxkak eskainiko dira eta ibilbide ezberdinetan Tafallako kaleak zeharkatuko dituzte kalejiran musikarien laguntzaz (txistulariak, soinulariak, albokariak, gitarrak… Bidean, gune zabaletan hainbat kanta abestuko dira.

ZER DA EUSKAL HERRIA KANTUZ?

Orain dela 28 urte (1997 urtean), Baionako Oihana eta Hiriondo ikastolen alde antolatu zuten lehen kale kantu saioa. 2003 urtean berriz Egunkariaren itxiera salatzeko eman zen lehen kantujira Donostian. Hortik aurrera Euskal Herriko herri, hiriburu eta hamaika txokotan sortu dira kalez kale kantuan arituko diren taldeak. Kantu talde hauen helburu nagusiak hiru dira:

• Kantatzeko ohitura berreskuratzea. Herrietako kaleak kantuz dinamizatzea, alaitzea, jai-giroa bultzatzea, beti ere jendartearen parte-hartze librea eta irekia bultzatuz.
• Euskal Kantagintza ondare gisa hedatzea. Kantuen bitartez euskal kultura, berezko izaera, ohiturak eta historia..ezagutzera ematea. Azken batean kultur transmisio lanari ekitea.
• Kalez kale kantatzeko dinamika honen bitartez, euskararen erabilera bultzatzea. 2010eko abenduaren 5ean, Durangon bildu ginen hainbat kantu taldeetako kantuzaleok, (egun mingarria askorentzat, bezperan Xabier Leteren heriotzaren berri izan baikenuen). Durangoko azokaren inguruan egindako kantujiraren ondoren, guztien arteko koordinazioari eta elkarlanari ekitea adostu genuen. Ordutik sortu zen Euskal Herria Kantuz sarea

EUSKAL HERRIA KANTUZ sariari buruz gehiago jakiteko, hemen.

Tafallako egunaren egitarau zehatza hemen.