Geo-jokoak: irudietako tokiak mapa batean kokatuz
Geoguessr aplikazio eta joko geografikoa da, non mundu osoko ausazko kokalekuetan jartzen zaituen sistemak, eta denbora jakin batean munduko mapan ahalik eta kokapen gertukoena asmatu behar duzun. Aukera gehienak ordainpekoak dira eta horregatik doako alternatiba bat ere aurkeztuko dizuegu: City Guesser. Geo eta Hiri Asmatzaileak lirateke euskaratuta. Eguneraketa asteazkena 24: domeinu aldaketa egin berri du City Guesserrek (hau da kasualitatea!) https://cityguesser.eu/-ra igarota eta zuzendu ditugu albisteko estekak.
Geoguessr-en jokalariei Google Street View irudi panoramiko bat erakusten zaie, eta ahalik eta zehatzen asmatu behar dute non dauden. Zenbat eta hurbilago asmatu benetako kokalekua, orduan eta puntu gehiago lortzen dira. Banakako partidak eta multiplayer modua ditu, baita erronka tematikoak ere. Anton Wallen suediar programatzaileak sortu zuen 2013an, eta oso ezaguna bihurtu da geografia zaleengan eta Youtube edo Twitch bidez partidak ematea ere ohiko bihurtu da.
Klon dexente ditu Geoguessr-ek eta horietako bat, erabiltzen erraza delako, aurkeztu nahi duzuegu: City Guesser. Bestetik bereizten da nagusiki Street View irudiak beharrean bideo batez erakusten dizulako tokia. Baina printzipio bera, mapa ireki, mugitu eta egin zoom, eta ea ze hurbiltasunekin asmatu duzun.
Publizitate dexente ageri da, baina City Guesser doakoa da horri esker. Eta aukera tematiko eta geografiko mordoa dauka. Klikatu dugu Europakoan eta agertu zaigu kale bateko bideoa... Londres iruditu zaio Sustatuko editoreari, baina ez, York hiria zen:
Probatu City Guesser eta ea zer iruditzen zaizuen.
Erantzun
Sartu