Dokumental didaktikoa: Eibar desarrollismoaren urte gorenetan

Eibarko BHII eta Batxilergoko ikastetxeetako ikasleentzako pentsatua eta jende orori ere zuzendua, dokumental honek herriaren historiaren errepaso bat egin nahi du, ikasleen eskola-kurrikuluma kontuan hartuta, testuinguru jakin batean izandako gertaera jakin batzuk azalduz.

Lau zatitan dago banatuta dokumentala, lau garai erretratatuz.

• Aurrenekoak 1960-1965 urteak hartzen ditu, hazkunde akaso larregizkoaren urteak. Eibarrek, orduan 31.860 biztanle zituen; lana nonahi; fabrika handiak eta etxe azpietako tailer txikiak.
• Bigarren zatikoa dugu (1966-1972) Eibarko herriak ezagutu duen arorik oparoenetakoa: ordukoa dugu lehen etxe-orratza, Untzagako dorrea; beharrik ere ez zen falta; kultura-gosea zegoen, Euskal Jaiak, orduko Fiesta Vascak, sekulako arrakasta lortu zuen; Boleran eta Jai-Alaian kantu-txapelketak antolatzen ziren; Juan XXIII kooperatiba-kontsumoa zabaldu zen Urkusuan.
• Hirugarren atalean (1973-1975), petrolioak izandako prezio-gorakadaren ondorioa, inflazioa eta herritarrengan izan zuen eragina islatzen da; eta politikan, Añoveros auzia, frankismoaren heriotza-zigorrak eta Francoren heriotza.
• Trantsizioa deiturikoa da amaierako garaia (1976-1982). Eibarren auzolanaren eredutzat har daitekeen Gure Herria elkartea. Kulturaren eta euskararen arloan aurrerapausu handiak eman ziren; emakumeen eskakizunak, ordura arte isilean egondakoak... Eibarrek 39.919 biztanle zituen 1979an, sekula izan duen biztanle-kopururik handiena, eta eskolaume asko zeudenez, eskola berriak jaso ziren 1978. urtean (Arrateko Andra Mari, Iturburu ikastola).

Zailak izan ziren urte haiek; gorabehera eta gatazka handiko bi hamarkada izan ziren, baina baita ilusioaren eta aldaketaren hamarkadak ere.

Informazioa gehiago hemen, eta dokumentala Youtuben.