Gladys Saria: 2024ko deialdia ireki da

Joan den astekoagerraldian antolatzaileek adierazi zutenez, Gladys Saria "erreferente bilakatu da jada euskal ingurune digitalean lan egiten duten emakume gazteen aitortzan. Izan ere, neska gazteak ibilbide teknologikoari ekitera animatzea du helburu, horrela euskal erreferente berriak sortuz."

Aurreko urteetako Gladys saridunak izan dira, hain zuzen:

• 2021: Ane Iturzaeta Agirre
• 2022: Olatz Perez de Viñaspre.
• 2023: Amaia Abanda Elustondo. 

Hautagaiek bere burua aurkez dezakete sarira, baina erakunde, enpresa edo norbanako batek ere proposatu ahalko du hautagaiaren izena eta bere merezimenduak azaldu. Era berean, epaimahaiak ere aurkez ditzake hautagaitzak. Sari bakarra izango da, baina epaimahaiak honako irizpide hauek izango ditu kontuan:

• Proiekzioa: hautagaiak duen etorkizuneko proiekzioa baloratuko da.
• Ibilbidea: hautagaiak garatu duen ibilbide profesionala baloratuko da.
• Profila: emakumeak ingurune digitaleko sektorean inspiratzeko eta ahalduntzeko profila izatea.

Aurrekoez gain, hautagaiaren lanean eta ibilbide profesionalean euskarak izan duen presentzia ere baloratuko da. Hautagaiaren egoera pertsonalek bere ibilbide profesionalean izandako eragin edo etenaldiak ere aintzat hartuko dira.

Hautagaitzak aurkezteko eta informazio gehiago, webgunean: https://gladyssaria.eus/ 

(argazkian, joan den asteko agerraldian Olatz Arbelaitz EHUko Informatikako Fakultateko Berdintasun Batzordekoa, Nerea Isasi Gipuzkoako Aldundiko Berdintasuneko foru zuzendaria, Lorea Arakistain Puntueuseko marketin zuzendaria, eta Idoia Bustinduy Danobatgroup industria taldeko komunikazio arduraduna, sarien babesle gisa).