Kanaldudek irismena zabaldu du eta webgunea berritu
Kanaldude tokiko eta Interneteko telebistak webgunea berritu du, eta telekomunikazio zerbitzuen bide bere irismena zabaldu du Ipar Euskal Herrian. 2018tik zuen webgunea Nafarroa Beherean kokatutako ekimenak, baina orain itxuraz aldatu eta berritu da.
Ekoiztutako bideoteka guztia bertan dago, eta lehendik programaka antolatu bazegoen ere, sailkako artxibo tematiko berria du orain, nahieran ikusteko. Ikus adibidez dokumentalen saila, edo gertakariena. Webgune berrikuntza hau CodeSyntax enpresak egin du, Sustatu egiten duen konpainia berak.
Bideo kalitatea handitua dago webgune berrian, eta baita bere zuzeneko streaming zerbitzua ere (ikus programazioa).
Kanaldudek iragarri du, gainera, laster bideoak modu azpi-idatzian ikusi eta irakurri ahalko direla. Elhuyar fundazioarekin elkarlanean, adimen artifizialak lagundurik, istanteko euskarazko azpi-idatziak sortzeko aukera izanen da webgunean integraturik.
Era berean, Euskararen Erakunde Publikoaren laguntzaz egindako aurkezpenean iragarri dute aste honetan, Kanaldude telebista Ipar Euskal Herriko etxe guztietan ikusteko bidea irekia dela, Orange, Free, Bouygues eta SFR hornitzaileekin izenpetutako hitzarmenei esker.
Herri ekimeneko telebista da Kanaldude, eta sustengu publikoa eskertzen dute.
Erantzun
Sartu