UEUren 50 urteak: lorpen digitalen errepaso bat
Udako Euskal Unibertsitateak 50 urte betetzen ditu aurten, eta atzo izan zen ospakizun ofizial nagusia Bilboko Kafe Antzokian. Kronika irakur dezakezue Berrian, hizlari nagusien parte-hartzeen berri izanez, baina Sustaturako beste zerbait ekarriko dugu hona: Kepa Sarasola UEUko zuzendariak eta Ane Sarasua idazkari nagusiak egindako errepasoan aipatu zituzten proiektu digital edo internetiko interesgarriak.
Interneteko proiektu akademikoen artean, honako hauek nabarmendu zituzten UEUko ordezkariek:
- Inguma, euskal komunitate zientifikoaren bilgun handia, artikulu akademikoen datubasea, zeinean 13.000 euskaldunen lanak biltzen diren.
- Tesiker, euskaraz defenditu eta argitaratutako doktore-tesien datubasea, Eusko Jaurlaritzako Euskadi.eus-eko zerbitzarietan tokia duena, zeinean 700 tesi baino gehiago kontsultatu daitezkeen.
- Artizarra sare soziala, euskarazko profesional zientifiko eta akademikoen "linkedina", oholtzatik definitu zuten bezala.
- Txiotesia, urtero egiten duten ekimena, nork bere tesi proiektua azaltzeko modu dibulgatiboa: Twitter bidez mezu laburretan azaltzea da kontua. Seigarren edizioa laster izango da, 2022ko azaroan.
- Goi-mailako Online Institutua, UEU eta EHUren artean eratua, zeinak dagoeneko ehundaka ikalerentzako masterrak antolatu dituen. Erakunde hau lehen urrats gisa ikusten du UEUk, Euskarazko Online Unibertsitatea izan daitekeena sortzeko, eta helburu horri begira lan egin nahi dutela esan zuten atzo.
Sareko ekimen hauez gain, Sarasuak eta Sarasolak nabarmendu zuten presentzialitatea, topaketak eta ikastaroak (eta Ikergazte bilera handiak) funtsezkoak direla. Antolatutako biltzar nagusietan, oroitarazi zigutenez, Informatikari Euskaldunen Biltzarra izan zen antolatzen lehena 1996an, eta harrezkero 100 biltzar egin izan dira.
50 urteotako irudiak biltzen ditue bideo honetan, "presentzialitatea" gehiago gailentzen da online izaera baino... Polita da ikustea:
Erantzun
Sartu