Erosketak egin daitezke jada Durangoko Azokako dendan

Pandemia urteko Durangoko Azokak erakusleiho bakarra du, Interneteko denda.Katalogoa osatu dute ohiko erakusleek eta 2.319 produktu daude, horien artean 852 nobedadeak. Dendak bilatzaile azkar bat dauka, produktuak ondo deskribatuta daude, eta erosketa saskia arin prozesatzen da, bidalketa gastuen kalkulu garden batekin.

Bere unean iragarri zenez, salmenten %12ko komisioa Azokak hartuko du, kudeaketa eta logistika gastuetarako. Denda birtual hau abenduaren 8 arte dago irekita.

Ondoren, abenduaren 9tik urtarrilaren 8a arte, beste salmenta ekimen batek jarraituko du: “Zu non, han DA!” izeneko ekimenarekin, jardueren egitarau hedatu bat antolatu du Azokak, eta hainbat liburudendetan ere katalogoa eskuragarri egongo da.

Gogoratu halaber, Durango edo inguruetan bizi bazara, 8a arte egitarau bat ere badagoela, eta presentzialki izan zaitezkeela ikus-entzule, tokia erreserbatuz gero.