Teknologia albisteak

Aporta 2020 lehiaketa: Datu irekiekin, hezkuntzarako ideiak garatu

Sustatu

2020-10-15 : 08:29

EAEn antolatuako datu irekien lehiaketaz informatu genuen lehengoan, eta hemen da beste bat, Espainiako Gobernuak deitua kasu honetan: Aporta 2020.
Datu irekiekin hezkuntzarako aplikazioak garatzeko lehiaketa jarri da martxan.

Urtero gai desberdina aukeratzen da (2019an nekazaritza eta landa eremua izan zen); eta aurten, hezkuntza mundura bideratutako proposamenak sarituko dira. Hezkuntza aukeratzea ez da kasualitatea izan: Pandemiarekin lotu dute deialdian, erronka berriak planteatu direlako, hala nola etxetik ikastea, hezkuntza-eredu pertsonalizatuak abian jartzea edo ebaluazio-metodoak hobetzea.

Europar Batasuneko pertsona fisiko eta juridikoei irekita dago deialdia, eta lehiaketa bi fasetan garatuko da:

1. Ideia lehiaketa. Parte-hartzaileek datuetan oinarritutako soluzio teknologiko bati lotutako ideia original baten deskribapen zehatza eman behar dute, hezkuntza-sektorea hobetzen laguntzeko. Ideiak aipatu beahrko du, gutxienez, administrazio publikoek emandako datu multzo bat, nazioartekoak barne. Aurkeztutako ideia guztietatik 10 onenak aukeratuko dira, eta II. fasera igaroko dira.
2. Prototipoen garapena. Fase honetan, hautatutako 10 ideien egileek gutxienez 3 hilabeteko epea izango dute prototipo bat egiteko, simulazio, bistaratze, bideo edo multimedia-soluzioen bidez.

Hiru sari egongo dira.