Kontseilua neurri eske, pandemiak ez dezan euskara zokoratu ikastetxeetan
Kontseiluak eskatu du laster hastera doan ikasturte berezi honetan, pandemiaren meatxupean egin beharko den ikasturtean, euskararen gaia erdigunean jarri beharko dela. Kontseiluak zabaldutako prentsa-oharrean nabarmentzen denez, Paul Bilbao Kontseiluko idazkari nagusiaren esanetan, «orain arte, tamalez, ezer gutxi entzuten ari da ikasturte berriaren eskolaratzean euskararen gaiak izan beharreko arretaz». Bihar eta etzi dira ikasturteak hastekoak Euskal Herriko eskola gehienetan.
Hainbat neurri zehatz proposatu ditu Kontseiluak lanketarako.
- Gaitasunen ebaluazioa egitea ikasturte hasieran, neurri zuzentzaileak hartu ahal izateko.
- Hizkuntza errefortzuak (HIPI-ak) indartzea.
- Ikasleei hizkuntza ikuspegitik izango dituzten beharrei erantzuteko baliabide pertsonal eta materialak gehitzea, besteak beste, Hizkuntza Normalkuntza Planen eta hizkuntza-proiektuen egokitzapena egiteko bitartekoak esleituz.
- Ikasle ratioak egokitzea: irakasleek gelako aniztasun orokorrari erantzuteko (horien artean hizkuntza aniztasuna) aukera gehiago izango lituzkete ikasle ratio txikiagoa izanda.
- Ahozkotasuna jorratzeko errefortzuak lehen egunetik abian jartzea.
- Ikasleen emozioak euskararen erabilerarekin lotzeko helburua duten programak abian jartzea.
Pandemiaren aurretik ardura zuen Kontseiluak ikasleen euskara gaitasunarekin, eta itxialdiak ezagutzan eragin dituen kalte-ondorioei erreparatu beharra ezinbestekoa zela uste zuen. Hala ere, ikasleen artean hizkuntza-arrakalak sortzeko aukeraren larritasunak talka egin du errealitatearekin, Kontseiluaren iritziz.
Irudia da Jaurlaritzaren kanpaina batekoa, ikastetxeetan Koronabirusari aurre egiteko neurriak proposatzen dituena.
Erantzun
Sartu