Teknologia albisteak

Gipuzkoa Natura webgune berria: ibilbideak eta parke naturalak

Erabiltzailearen aurpegia
Sustatu
2020-05-24 : 13:11

Gaur ospatzen den Europako Parkeen Egunerako gertu, Gipuzkoako parke naturalen eta naturguneen berri informatzen duen Gipuzkoa Natura webgunea estreinatu da aste honetan. Gipuzkoako Foru Aldundiak jarri du martxan ekimena, Gipuzkoako Mendizale Federazioaren lankidetzan.

Gipuzkoako natura baliabideen zerrenda eta informazio zehatza dago, natura-parke, biotopo eta parketxe eran sailkatzen direlarik hauek, baina akaso ibilbideak dira webgunearen ekarpen interesgarriena: 170 baino gehiago daude oraingoz. Izan ere, Gipuzkoan homologaturiko oinezko bideen 1.500 kilometro daude. Track-a ordenagailura edo GPSra jaisteko aukera ere ematen du webguneak ibilbide horien kasuan.

Gipuzkoan bost parketxe daude:

  • Arditurri
  • Iturraran
  • Lizarrusti-Barandiaran
  • Anduetza
  • eta Arantzazu

Lau natura-parke daude, lurraldearen %15 baino gehiago harrapatzen dutenak:

  • Aizkorri-Aratz
  • Aralar
  • Pagoeta
  • eta Aiako harria.

Parke eta parketxe hauetako interpretazio eta harrera zentroak Gipuzkoako Parketxe Sarea Fundazioak kudeatzen ditu. Batez beste, urtero, 50.000 bisitari baino gehiago artatzen dira.

Azkenik, hiru biotopo babestu daude:

  • Iñurritza
  • Deba-Zumaia
  • eta Leitzaran.

Webguneko edukiei dagokienez, zalantza geratu zaigu, CC marka ikusten da webgunean, Creative Commons esan nahi du horrek baina argitu gabe zein lizentzia zehatz (CC batzuk bakarrik dira libreak), eta lege oharrik ere ez dago.

Ezagutu https://www.gipuzkoanatura.eus

Erantzun

Twitter ikonoa  Facebook ikonoa  Sartu