Teknologia albisteak

Bertsolaritzaren artikulazioak, udako ikastaro bat

Sustatu

2019-07-19 : 16:01

Euskal kulturari so. Bertsolaritzaren artikulazioak izena darama Mintzola Ahozko Lantegiak udarako prestatutako ikastaroak. EHUren uda ikastaroen barruan, abuztuaren 22an eta 23an izango da, Donostiako Miramar Jauregia, eta matrikula egin daiteke hemendik.

Ikastaroan izango diren irakasle/hizlarietako batzuek bideoa grabatu dute ikastaroan zer emango duten aurreratuz:

Hor dira honako adituak:

Oihana Iguaran. Mintzatuko da emakumearen presentziaz... eta ausentziaz.
Miren Artetxe. Hiztun berrien artikulazioa bertsolaritzarekin.
Alberto Irazu. Rocka eta bertsolaritza.
Harkaitz Zubiri. Egungo bertsozaletasunaren argazkia, hiriaren eta kultura globalizatuaren ikuspegitik,
Jon Maia. Kultura garaikidearekin nola uztartu den bertsolaritza.

Beste hizlari hauek ere izango dira: Miren Amuritza, Nerea Ibarzabal, Josu Amezaga eta Iratxe Retolaza.

Helburu hauek markatu ditu ikastaroak:

Euskal Kulturaren egoeraz ohartzea, zehazki kontsumoaz eta (ez) transmisioaz.
Bertsozaletasunaren egoeraren eta bertsozaleen berri ematea.
Kulturgintzak euskararen berreskuratzean duen eraginaz ohartzea.
Bertsolaritzak azken hamarkadetan ezagutu dituen eraldaketen berri eman eta jabetzea.
Une honetan bertsolaritzaren baitan feminismoaren eskutik gertatzen ari den eraldaketaz jabetzea.

Informazio gehiago, Uda Ikastaroen webgunean eta Mintzolan.