Teknofiloen albistegia

Debarroko dolmenen ibilbidea

Erabiltzailearen aurpegia
Sustatu
2019-07-08 : 15:31

Dolmenak eta monumentu megalitikoak Euskal Herriko eskualde gehienetan aurkitzen ahal dira, baina Gipuzkoako mendebaldean, Debarroko mendietan dagoen kontzentrazio handi eta gertuko samar batean ibilbide bat antolatu da turismoarentzat berriki. Dolmenen Ibilbidea da hori, webgune bat sortu zaio, eta bisita gidatuak ere antolatzen dira.

Dolmenen Ibilbide honek Karakate-Iturriberri mendilerroa zeharkatzen du, eta Elgoibar, Soraluze eta Bergarako udalerriak lotzen ditu. 19 dolmen daude identifikatuta bidean, eta mendiko ibilbide ofizial gisa markatuta dago (PR-Gi 94 bidea). Familian egiteko modukoa da, 11 kilometro egin daitezke, 2 ordu eta 15 minututan. Webguneak autoa non utzi ere gomendatzen du.

Nahi dituzunean bisitatu ditzakezu dolmenak, noski,eta GPX track bat ere badago webgunean GPS bidez mendian ibiltzera ohituta daudenentzat.

Ingurua ikusteko beste modu bat bisita antolatuak dira. Eskualdeko turismo sustapeneko erakundea duela aste batzuk hasi zen hauekin. Datozen asteetan, lau bisita daude aurreikusita, bi euskaraz eta bi gaztelaniaz. Euskarazko hurrengoa, datorren igandean, hilak 14. Hemen informazio gehiago.

Erantzun

Twitter ikonoa  Facebook ikonoa  Sartu