Auzia Euskaraz, justizia alorreko hizkuntza normalizaziorako app bat

Justiziaren arloan euskararen erabilera sustatzea du helburu aplikazioak. Eusko Jaurlaritzak garatutako “Auzia Euskaraz” proiektuaren baitan sortu den aplikazio hau abokatutzan, prokuradoretzan eta notariotzan diharduten profesional euskaldunei zuzenduta dago bereziki, nahiz eta Zuzenbidearen esparruko unibertsitate-komunitatearentzat eta euskara juridikoan interesa duen edo demanda judizial bat euskaraz aurkeztu nahi duen edonorentzat ere baden.  
Aplikazioa doan jaits daiteke Android eta Ios euskarrietarako.

Helburuak

"Auzia Euskaraz" APPak bi helburu nagusi ditu: arlo juridikoko eragile euskaldunen komunitatea sendotzea eta hizkuntza juridikoko baliabideak eskaintzea gailu mugikorretik klik bakarrean. Berez, euskara juridikoaren datu-baserik handienetako bat da, eta 400.000 itzulpen baino gehiago daude erabilgarri.

Bi helburu nagusi horiek betetzeaz gainera, Eusko Jaurlaritzak beste helburu hauek ere bete nahi ditu:

• Komunitate juridiko euskaldunera kide berriak erakartzea. Orain arte 507 eragile juridiko daude sare horretan, bai abokatu, prokuradore eta fiskal profesionalak, bai barruti judizialetako funtzionarioak.
• Profesionalek euskara erabil dezaten sustatzea.
• Euskararen kalitatea ziurtatzea, hizkuntza juridikoarekin zerikusia duten zalantzak argituz.
• Hizkuntza normalizaziorako lantaldearen zerbitzua hobetzea.
• Erabiltzaileen esku jartzea Justizia Administrazioko hizkuntza normalizaziorako lantaldeak garatutako tresnak.

Baliagarritasuna

Aplikazioa lau tresna nagusik osatzen dute, eta pantaila nagusian agertzen dira:

• Ikono laranja: profesionalen zerrenda eskaintzen du, abokatu, prokuradore eta notario euskaldunak bilatzeko. Euskara Emaile ekimean parte hartzen duten profesionalen telefono-zenbakiari, helbide elektronikoari eta bakoitzaren kokapenari buruzko datuak ematen ditu.
• Ikono urdina: “Auzia Euskaraz” proiektuari buruzko informazioa ematen du.
• Ikono gorria: erabiltzaile motaren arabera, aukera ezberdinak eskaintzen ditu, besteak beste: komunitate juridiko euskaldunean sartu ahal izatea, inprimaki juridiko elebidunak, kontsulta pertsonalizatuak, hilabetekarien harpidetzea eta prestakuntza-pilula juridikoak jasotzea.
• Ikono berdea: terminologia juridikoa euskaraz kontsultatzeko tresna. Datu-basea da eta terminoak gaztelaniatik itzultzen ditu, hala nola “incoación de diligencias previas" (aurretiazko eginbideei hasiera ematea) edo “apoderado" (ahaldun). Barruan 400.000 itzulpen juridiko baino gehiago ditu bildurik: lexiko juridiko bateratua, eredu judizialak, glosategiak, lege-testuak , inprimaki elebidunak abokatuentzat... 

'Auzia Euskaraz' proiektua

Eusko Jaurlaritzak 2013ko abenduan jarri zuen abian “Auzia Euskaraz” proiektua, prozedura judizial osoa, demanda judiziala aurkezten denetik ebatzi arte, euskaraz tramitatu ahal izateko baliabideak eskaintzeko.  

Hiru urte hauetan lau epaiketa egin dira euskara hutsean: lehenengoa Bizkaiko Probintzia Auzitegian, bigarrena Lehen Auzialdiko eta Instrukzioko 2 zenbakiko Epaitegian, hirugarrena Bilboko Administrazioarekiko 5 zenbakiko Epaitegian eta azkena, duela gutxi, Tolosako epaitegi batean.

“Auzia Euskaraz” proiektuari buruzko informazio guztia bere blogean dago eskuragarri.

Jatorrizko albistea, cc-by-sa: Irekia, Eusko Jaurlaritza.