Nola aktibatu fitxa sailkapena Gmail berrian (jarraibideak euskaraz)
(aukera berri hauek nola aktibatu bere blogean azaldu du Maite Goñik, handik ekarri dugu, bere CC-by lizentzia baliatuz)
Jasotako mezuak horrela bistaratu ahal izateko, aukera berri hau aktibatu baino ez dugu egin behar. Aktibatzeko ondorengo urratsak jarraitu behar dira:
1. urratsa. Sartu zure Gmail kontuan, ohi bezala.
2. urratsa. Hautatu eskuineko ikonoa, ezarpen orokorrak aldatzen dituena. Bistaratze modu berria aktibatzeaz gain, ikonoaren gainean klik eginda, postaren itxura, bistaratzearen trinkotasuna eta bestelako ezarpernak aldatu ahal izango dituzu.
3. urratsa. Konfiguratu sarrera-ontzia hautatu (zerrendaren erdialdean). Oharra: ez baduzu ikusten aukera hori, atera Gmail-etik eta berriz sartu. Oraindik ere ikusten ez baduzu, Googlek aukera aktibatu arte itxoin beharko duzu.
4. urratsa. Leiho bat zabaldu ondoren, hautaketa egin beharko duzu. 5 fitxa onartzen dira:
- Nagusia: fitxarik ez duten mezu-kategoriak, atal honetan ikusiko dira.
- Sare sozialak: sare sozialetako mezuak, multimedia-partekatzeei buruzkoak, zita-zerbitzuenak eta bestelako webgune sozialenak.
- Eskaintzak: promozioak, eskaintzak eta bestelako marketin-mezuak.
- Eguneratzeak: Automatikoki sortutako eguneratze pertsonalak, berrespenak, ordainagiriak eta fakturak barne.
- Foroak: Eztabaida-talde eta posta-zerrendetako mezuak.
Hautatu horietatik fitxa ezberdinetan ikusi nahi dituzun mezuak.
5. urratsa. Beste leiho bat zabalduko da. Ados klikatu.
Hauxe izango da emaitza:
Bistaratzeko modu berrira ohitzea pittin bat kostatu zaidan arren, orain oso praktikoa iruditzen zait. Pentsatzen dut egun batzuk barru, Googlek zuzenean aktibatzeko aukera emango duela. Bitartean, baliagarria izango zaizuelakoan, hortxe uzten ditut jarraibideak.
Iturria: How to enable the new tabbed Gmail inbox right now. Paul Morris, Redmond Pie. Euskaraz: Maite Goñi, Maitego.com (Creative Commons Aitortu, cc-by).
Erantzunak
Kaixo, hirukote!
Egia esateko, asko dauka hobetzeko (izen pertsonalizatuak ipini fitxetan, edukia modu pertsonalizatuan gehitu...). Halere, horrek lan bat eskatzen du eta lehen ere bazeuden bestelako moduak sarrera-ontzia eskuz antolatzeko. Beraz, nik uste dut berrikuntza honen gauzarik interesgarriena dela guk ezer egin gabe Googlek antolatzea gure edukia (edo antolatzen saiatzea, behintzat). Guztiarekin ere, nire sarrera-ontzia izugarri arindu da. Adibidez, Twitter, Youtube, Facebook eta sare sozial ezberdinetatik datozkidan mezu guztiak, eta ez dira gutxi, 'Sare sozialak' fitxara iristen zaizkit orain eta bakar-bakarrik horrexegatik merezi du. Aipatu bezala, lehen ere bazegoen antolatzeko aukera, besteak beste, filtroak ipinita. Adibidez, Twitterretik jasotako mezuak sarrera-ontzitik pasatu gabe zuzenean artxiba zitezkeen (eta daitezke), baina nik gero ez nituen kontsultatzen eta hortxe geratzen ziren, erabat ahaztuak. Orain berriz, ez didate oztoporik egiten eta kontsultatzeko oso eroso daude. Gainera, orokorrean, fitxa sistema honek nire mezuak nahiko ondo sailkatzen ditu, nahiz eta oraindik hobekuntzarako tarte handia badagoen.
Bide batez, aurrekoan saltseatzen ari nintzela, mezuak fitxa batetik bestera eraman daitezkeela konturatu nintzen. Horretarako, ipini mugitu nahi duzun mezuaren gainean eta eskuinarekin klikatu. Arrastaka eraman hautatutako mezua fitxa batetik bestera.
Lasterbideei dagokienez, Aitzol, hauxe bakarrik topatu dut, baina ez dago ezer honi buruz... https://support.google.com/mail/answer/6594?hl=en
Ikusteko dago ea hobetzen jarraituko duten. Espero dut baietz, ze, niretzat posta eramangaitza da. :-)
Fitxa ezberdinak gaitu ditut eta Gmailek bere lana egin du mezuak batean edo bestean kokatuz. Praktikoa? ez dakit ba, lehen sailkapen hori ez da oso txukuna izan. Norberak nahi dituen fitxak sortzea posible balitz, GTD moduko sailkapen bat egiteari bere puntutxoa ikusten diot, baina horretarako lehendik ere badaude etiketak.
Ez dakit ba...