Ruper ere harrituta bere kantuaren erabilpenarekin
Ruper Ordorikak ere bere harridura erakutsi du eusko legebiltzarkideen gabonetako kantuaren inguruan. Iturriren blogean erantzun du:
Ez dut uste inor ni baino gehiago harrituko zenik telebistan Zaindu Maite Duzun Hori zenbait parlamentariren ahotan entzutean. Labur esateko, gaur arte inork ez dit baimenik eskatu, eta susmoa dut aurrerantzean ere ez didatela eskatuko.
Gehiago Harrikadak blogean: Eta Ruperrek, zer dio Ruperrek?
Orain arte gertatutakoa gogoratzearren: ETBk 19 legebiltzarkide jarri ditu kantuan Gabon gauean emitituko duen Euskal Kantuen Gaua saioa, (ikusi bideoa EITB webgunean). Hautatutako abestia, Ruper Ordorikaren: "Zaindu maite duzun hori".
Oso minduta idatzi zuen Berrian Jon Eskisabelek Gorroto duzun hori artikulua. "Euskaldunon Egunkariaren itxierarekin lotuta dagoen kantua" baita Zaindu maite duzun hori. Aritz Galarragak Hori suertia zutabea sinatu zuen ondoren, eta parlamentarietako batek, EH Bilduko Xabier Isasik, Euskaldun izatea zein gogorra den apuntea argitaratu zuen bere blogean.
Hori guztiori ikusita, Mikel Iturri blogariak galdera bota zion Ruperri: Zer dio Ruperrek?
Gaur goizean etorri da abeslariaren erantzuna, gorago aipatu bezala. Besteak beste, hauxe dio: Ez dut uste inor ni baino gehiago harrituko zenik telebistan Zaindu Maite Duzun Hori zenbait parlamentariren ahotan entzutean. Labur esateko, gaur arte inork ez dit baimenik eskatu, eta susmoa dut aurrerantzean ere ez didatela eskatuko.
Erantzunak
Banio, egia esan, harritu bai, asko. Haserretu,mindu? Batere ez. Zenbait legebiltzarkide jakinek abesti hau abestean ez dut uste abestia zikindu, lorrindu edo profanatzen dutenik. Euren burua jartzen dute agerian. Jakin beharko dute zertan ari diren, zer ari diren kantatzen eta zertara konprometituko liratekeen (abestiari kasu eginez) Euren burua jartzen dute barregarri. Imajinatzen duzue BBVAko zuzendaria "Ez, ez dut nahi... holako zibilizaziorik", adibidez? Inori klate egitekotan bere buruari egiten dio.
Juanjo Olasagarre ere aritu da "Euskal Kantuen Gaua" saioaren aferaren inguruan, Eskisabelen kritiken harira http://www.deia.com/2012/12/15/opinion/columnistas/zirrikituetatik-begira/euskara-unibertsala
Suposatzen dut Trifulca Posse-ren nahasketak ere (Raper Ordorika) ez duela Oñatiko kantautorearen baimenik. Edo agian bai. Berdin dio. Berdin da. Berdin zait. Baina iruditzen zait kategoria bereko kontu bat dela, gusto gehiago edo gutxiagoz egina.
Fight the power, bai, baina remixatu kultura ere bai.