Sua filma estreinatuko dute larunbatean, Arabako Ozaeta herrian

Ez da film dokumentala. Asko du historiatik, baina baita fikziotik ere. Pierre de Lancre inkisidoreak 600 pertsona baino gehiago torturatu eta hil zituen Lapurdin, eta hori irudikatzen du filmak.

Autogestioaren bidez egin dute lan guztia, jendearen laguntzarekin eta bestelako ekimenak antolatuz. Egileek, baina, zulo ekonomiko handia dutela aitortu dute, eta arazoa estreinaldiekin konpontzeko itxaropena dutela adierazi dute. Donostiako Larrotxene Kultur Etxeak utzi dizkiete kamarak, antzerki taldeek utzi dizkiete aktoreen jantziak, baita beraiek egin ere.

2004an dokumentazio lanekin hasita, amaitu dira ekoizpen lanak. Orain, filma herriz herri eskainiko dute: Tolosa, Ibarra, Algorta, Lizarra, Billabona eta beste hainbat herrietan ematea aurreikusita dute. Hala ere, inork bere herrian proiektatzeko interesa izango balu, beraiekin harremanetan jartzea besterik ez da egin behar suafilma@gmail.com helbidean.