"Xora", Zubererazko lehenengo filmaren trailerra ikusgai sarean

"Xora" filmaren ibilbideak aurrera darrai. Peio Cachenaut zuberotarrak zuzendutako filma da. Duela bi urte hasi zen Cachenaut gidoia lantzen, «Zuberoan egunero gertatzen dena» oinarri hartuta. Hiri bizitza eta mendi ingurukoa uztartu ditu, baita zubereraren bi alderdi ere, bi pertsonairen bitartez: batak euskara du ama hizkuntza; bestea, aldiz, euskaldun berria da.

Jef Goihenexpe eta Tttittika Rekalt dira filmeko aktore nagusiak. 45.000 euroko aurrekontuarekin, hainbat erakunde eta herritarrek lagundu dute egitasmoan. Hebentik elkartea, Aldudarrak Bideo elkartea eta Baleuko ekoizpen etxea dira horietako batzuk.

Grabazioa abuztuan izan zen, Mauleko karriketan zein Larraine inguruko borthuetan. Grabazioaz eta filmaz kronika ederra egin zuen Mikel Asurmendik Argian.

Sinopsia

Egun guzietako harat honatez aserik, bere ofiziozko perspektibek asperturik, nausiaren eskeintzak ukanik ere, Xiberotar gazte bat idazteari lotzen da suharki. Holaz bere osaba zaharraren xenda edireiten du, Hollywood izeneko bere gisako idazlea ; Ameriketan ari izanik, bortuan bizi da ber bera, ermita bezala. Hari arrimatuko da, ber denboran desafio eta miresmena sortuz bi gizonen artean.

Gizon gaztearen pozaldiak osabarekiko bisitaldietan daude, bere etxolan aholku bila doalarik, bai eta Nerea bere neska lagunarekin, hau hurruneko bidai luze batetarik Xiberoara itzuli berri baita.

Idazketak bere bizian leku gero eta handiagoa hartzen duelarik, gizon gazteak aldaketa ttipi bat nabaritzen du bere inguruan, ulertu gabe haatik urratsez ürrats gizon jantzi beltz batek jarraitzen duela, gau eta egun hari zelatan dabilena. Gizaki misteriotsu horrek emaiten du gainera eragina duela gaztearen inguruko gertakari bitxietan, batez ere bere laneko nausia eta haren familia hunkituko dituenetan.

Gizon gaztea ez da batere hortaz enteratzen, baina Nerea bere neska laguna gertatzen ari denaz jabetzen hasten da. Nor da gizon jantzi beltza ? Idazle gaztearen irudimenean sortua, edo haren osabarenean ? Edo beste zerbait ote litake ? Gaztearen kontzientziak zorroztu behar duke presentzia honi aurre egiteko, erantzunak berak lortzeko...

Informazio guztia: Xora-filma.com