Star Wars filmaren remake bat, zaleen eskutik

Casey Pugh eta Jamie Wilkinson gazteak izan dira proiektu honen bultzatzaile eta egileak. 2009. urtean bururatu zitzaien ideia eta berehala zabaldu zuten laguntza-deialdia sarean "Star Wars 473 pusketatan zatitu dugu eta pasarteak zaleen artean bertsionatzea nahi dugu". "Star Wars Uncut" deitu zioten euren proiektu berriari.

Harrezkero hainbat pasarte bildu eta landu dituzte. Tartean, 2010. urtean, Emmy saria ere jaso zuten, proiektuak zuen alderdi berritzailea azpimarratuz.

Ondoren, material guztia editatzeko eta muntatzeko lana etorri da. Lan eskerga, dudarik gabe. Arazo legalei ere aurre egin behar izan diete (besteak beste, George Lucasi bisitaldia, bere onespena eman zezen). Lan teknikoa bikaina bezain handia izan da. Eta filmean zer aurkituko dugun? Denetarik: Lego piezekin egindako pasarteak, txontxongiloekin egindakoak, animaziozkoak... baita aktoreekin egindakoak ere, noski, bakoitzak bere estilo erabat pertsonala emanez bere 15 segundu horiei. Euren webgunean informazio gehiago: www.starwarsuncut.com.

Azken asteotan zatitxoak ikusi ahal izan dira, han eta hemen, baina joan zen ostiral arratsaldean argitaratu zen azken emaitza. Youtuben daukazu ikusgai (goian itsatsita), 2 ordu, 3 minutu eta 53 segunduko artelana.