Sagar edo sagardoarekin egindako errezeten lehiaketa

Errezeten lehiaketa hau, Igartubeitiko Dagardo Astearekin lotua dago, eta hain zuzen ere, gaur hasi da Aste hori.

Sagardo Asteari hasiera emateko, Gipuzkoako Foru Aldundiaren X. Sagardo Lehiaketako irabazleei sariak banatu zaizkie Igartubeitin. Gainera, asteburuan ohiko zanpaketa, antzezpen, kirikoketa, sagar erakusketaz gain, bertsolari, albokari eta trikitilariek giroa alaituko dute. Sagar motei buruzko jardunaldia ere antolatu dugu San Telmo museoan. IV. Argazki Lehiaketa edo goian aipaturiko sagar edo sagardoarekin egindako errezeten lehiaketa dira aurtengo sagardo asteko beste ekitaldi batzu.

Argazkiak.org | Sagardo Astea 2011 © cc-by-sa: sustatu

Gipuzkoako Foru Aldundiak, Igartubeiti dolare-baserri hau zaharberritu du, baserriaren urrezko aroko, hau da, gure historiako garai jorienetako, adierazle bikaina berreskuratzeko eta gure arbasoen bizimodura hurbiltzeko asmoz. Museo bizia izateko sortua denez, eta aurreko esperientzien arrakasta kontuan harturik, XVI. mendeko baserritarren ohiko prozedura jarraituz, dolareko lana berreskuratu eta jendeari jarduera haren berri zuzenean eta zehatz-mehatz eskaintzea erabaki dugu. XVI. mendeko zurezko egitura hau indarrez bihurritzea, sagarraren usaina eta lehen muztioaren lurruna, aspaldiko lan baten lekuko izatea... jardun honetan dena da zirraragarri.

Zanpaketak

Sagar zanpaketak egunero izango dira, goizez. Asteburu eta Pilarika egunean eguerdian, 12:00etan zanpaketa bat egingo da, eta arratsaldez,
17:00etan beste bat izango da.

Zanpaketa bakoitza baino lehenago 50kg sagar gehituko dira kirikoketa erakustaldi bat egiteko. Asteburuan ordea, Jo ala jo elkartekoek kirikoketa egokiak egin ditzaten, 150kg sagar gehituko dira zanpaketa bakoitzaren aurretik.

Antzezpenak

Ezkio-Itsasoko eta Yartu elkarteko kide diren bost bizilagunek, XVII. mende hasieran baserrian bizi izandako Kortabarria familia antzeztuko dute.

XVI. mende bukaerako eta XVII. mende hasierako janzkerekin jantziak, baserria erakutsiko diete bisitariei eta beraien zereginei buruz hitzegingo diete. Bisitariak elikadura, sagardogintza, ohe- jantzi eta ehun, altzari konponketa, lanabes eta egur egitura, ereitea, baratzeko produktuei eta abarrei buruzko arloetaz jabetuko dira.

Sagardoa kirikoketa erritmora

Arizkungo Jo ala Jo taldeak sagarrak kirikoketa erritmoan zanpatuko ditu, larunbat, igande eta asteazkenean, urriaren 8, 9 eta 12an. Kirikoketa, pisoiekin, sagarra txikitzeko mazoekin egiten den txalapartaren aldaera da.

Antzina dolare baserrietan ohikoa zen ohitura hau, Igartubeiti Baserri Museoan gogora ekarriko da, usadio zaharrak berreskuratu eta ikertzen dituen kultur elkarte honen eskutik.

Sagar erakusketa

Ezkio-Itsason bildutako sagar bariedadeak ikusgai izango dira sagar astearen baitan: argentina sagarra, pinoi, errege gaxie, txori sagarra, mendeun sagarra, golden, madari sagarra eta limoi sagarra, besteak beste.

Yartu elkarteak, Ezkio-Itsasoko udaletxearen laguntzaz antolatutako erakusketa, interpretazio zentroan kokatua.
Sagar motei buruzko jardunaldia:

Bertako sagarraren erabilerak hitzaldia

Urriak 5, arratsaldeko 18:00etan San Telmo Museoko Areto Nagusian. Iñaki Larrañagak, Gipuzkoako Foru Aldundiko Garapen Pomologikoko Teknikariak, emango du.
Hitzaldiaren ondoren, Iñigo Cojok San Telmo Museoko Bokado jatetxeko laborategiko arduradunak, sagar mota desberdinek sukaldean eskaintzen dituzten aukerak aurkeztu eta dastatzera emango ditu.

Izena emateko 943 72 29 78 telefonora deitu edo mezu bat bidali igartubeiti@gipuzkoa.net e-mailera.

K6 Gestión Cultural-en eta The Glutton Club-en proposamena, San Telmo Museoaren lankidetzarekin.

Sagardo Astea Argazki Lehiaketa

Sagardo Astea kamaratik edo mugikorretik! Parte hartu eta lortu saria!