Wikileaks: AEBen enbaxadaren euskal informatzaile babestua, Arabako Foru Aldundiko kabinete-buru berria da

Cablegate auziko mezuak publiko egiten hasi zirenean, euskal auziarekin zerikusia izan zezaketenak identifikatu genituen. Hona Sustatun atera genuen zerrenda. Orduan gutxi zeuden publiko eginak, orain denak irekita daude, eta une esanguratsuak edo kable interesgarriak izan daitezkeenak errepasatzen ibili gara. Batez ere, Loiolako prozesuaren ingurukoak.

Ez dago gauza handirik, itxura batean, salbu eta enbaxadak, Poloff delako baten bidez, Euskal Herriaz eta ETAren kontuez informatzeko kazetari bat erabiltzen zuela: El Correo egunkariko Oscar Beltr�n (deitura Beltran de Otalota du, izatez). Badirudi Poloff ez dela pertsona bat baizik eta akronimo bat, Political Officer izan daiteke (Madrilgo enbaxadaz gain beste hainbat tokitako kableetan Poloff ugari aipatzen dira).

Hona Beltran aipatzen duten mezuak:

• http://wikileaks.org/cable/2006/09/06MADRID2435.html
• http://wikileaks.org/cable/2007/01/07MADRID17.html

Bigarren horretan irakurtzen dugu: "Oscar Beltran (strictly protect) told Poloff..." Alegia, babestu beharreko informatzailea dela.

Eta, hain zuzen ere, gaur jakin da kazetariak izendapen politikoa jaso duela. Arabako Diputatu Nagusiaren kabineteko burua izango da aurrerantzean. Azken foru hauteskundeen ondoren, PPk lortu du Arabako Foru Aldundiaren kontrola, eta Javier de Andres da Diputatu Nagusia.

Beltran de Otalora lehenago ere egon izan da informatzaile berezien kontuekin nahastua. 2007. urtean, telefonoa pintxatu zioten epaile baten aginduarekin (Ertzaintzak eskatuta), susmoa baitzuten Ertzaintzan polizia-indar honen barruko filtratzaile batek Beltran erabiltzen zuela barneko informazioa kanporatzeko. Ikerketa hura ez zen inora iritsi, nonbait.

Informazio gehiago:

• Wikileaksen iragarpena, kable guztiak argitaratuta.
• Madrilen jatorria duten kableak.
• Euskal auziarekin zerikusia izan dezaketen kableen zerrenda.