Ikerkuntza helburu OEEren XXI. Jardunaldietan

Paziente eta gaixoekin euskarazko harreman profesional egokia eskaini ahal izateko, lehengo betebeharra hizkuntz gaitasun egokia lortzea zenez, prestakuntzari lehentasun osoa eman genion gure elkartean garai hartan. Horrela, urtez urte osasunari buruzko jardunaldiak antolatu izan ditu OEEk, Hegoaldeko lau herrialdeetan.

Errepaso historiko bat eginez gero, arlo asko jorratu direla esan genezake, esaterako, gaixotasun infekziosoak, osasun arazoak zahartzaroan, eritasun kronikoak, larrialdiak, genetika, neurozientziak, prebentzioa, gaixo terminalak, alergiak, gaixotasun kardiobaskularrak edo iaz egin ziren emakumeak eta osasunari buruzkoak, adibidez.

Gogoratu beharra dago orain 21 urte medikuntza edo erizaintza fakultateetan euskararen presentzia hutsaren hurrengoa zela eta beraz, ordura arte osasun zerbitzuetan lan egiten genuen beharginok gazteleraz edo frantsesez ikasketa guztiak egin ondoren hutsune nabarmenak genituela gure lana euskaraz garatzeko.

Aurten ere, urteroko hitzorduari hutsik egin gabe, Ikerkuntza: ezagutzatik ekintzara gai hartuta, ekainaren 3an eta 4an batuko gara berriz ere, oraingo honetan Gasteizen, XXI. Jardunaldiak burutzeko.

Gai hau aukeratzearen arrazoia sinplea da: osasun alorrean bizi ditugun hobekuntza guztiak ikerketaren ondorioz sortu direla gauza ukaezina da. Horrela, medikamentu eta teknologia berriak ez ezik, gaitzak diagnostikatzeko, tratatzeko eta prebenitzeko prozedura egokienak ere, ikerkuntzari zor dizkiogu.

Oro har, esan daiteke ikerkuntza gero eta zeregin handiagoa hartzen ari dela gizarteen eraldaketetan. Horren barruan, osasun zerbitzuen bilakaeran duen garrantzia handia da. Egiten diren ikerketa lanei esker, urtero berrikuntza handiak izaten ditugu gure lanean, diagnostikoak egiteko orduan, tratamenduetan, etab.

Jardunaldietan islatu nahi dugun moduan, gure inguruan egiten den ikerketak hainbat alorretan lagundu du, esaterako gizartearen osasuna hobetzen, gure osasun sistemaren efizientzia handitzen, eta, gaixo bakoitzari gehien egokitzen zaion tratamendua bereizten.

Horregatik ikuspegi desberdinetatik antolatu dira mahai inguruak, ikerkuntzak pertsonengan, osasun publikoan eta sisteman nolako eraginak dituen aztertuz.

Lehenengoan gero eta gehiago entzuten ari den medikuntza pertsonalizatuaren inguruan garatuko da, Medikuntza Eraberritzailea, Genetika eta jaioberrien diabetesa, Zelula amak eta azkenik, Nano-imanen zenbait erabilera medikuntza arloan izeneko gaiak landuz.

Osasun publikoan duten eraginari dagokienez, Desberdintasun sozialak osasunean, Minbiziaren bahetzea eta Gaixotasun Kardiobaskularrak gaiak aztertuko dira.

Azkenik, ikerkuntzak sisteman duen eragina hobeto ezagutzeko, Gaixo kronikoen jarraipen aktiboa, Ikerkuntza botika-erabileran eta Lipidoei buruzko jarduera klinikoaren gidaliburua izango dira aztergaiak.



Baina mahai inguruez gain, gauza gehiago izango dugu Gasteizen. Batetik 19 ahozko komunikazio aurkeztuko dira. Horiez gain, bi tailer ere, Galdera klinikoaren egitura eta bilaketa bibliografikoa eta Irakurketa kritikoa. Amaitzeko, ikerkuntzari buruzko 33 poster izango dira ikusgai biltzarraren bi egunetan.

Egitarauari azken ukitua emateko, arlo soziala ere landuko da eta partaideek afarian eta Gasteizko bisita gidatuan esku hartzeko aukera izango dute, gure hiriak izan dituen aldaketak zein alde historikoa ondo ezagutzeko.

Bi hamarkada luze pasatu ondoren, OEE Elkarteak, 400 bazkidetik gora izanik, osasungintzan eragiten jarraitzen du, prestakuntzari eta euskararen normalizazioari bere ekarpena eginez.

Guzti honengatik, osasun alorrean euskaraz lan egin nahi duten profesional guztiei jardunaldi hauetan parte hartzeko gonbita egin nahi diegu. Gasteizen ikusiko dugu elkar.

Felipe Aizpuru
OEEren XXI. Jardunaldien Batzorde Antolatzaile eta Batzorde Zientifikoaren izenean