Gpuntua martxan

Halaxe adierazi dute Gipuzkoako Bertsozale Elkarteko kideek Orioko kultur etxean egin duten prentsaurrekoan. Parte hartu dute prentsaurrekoan Saroi Jauregi Gipuzkoako Bertsozale Elkarteko Lehendakariak, Oroitz Azurmendi Elkarteko koordinatzaileak eta Unai Manterola Orioko Errikotxia Bertso Eskolako kideak.

“Lau urtean Gipuzkoako errealitatea aldatu da, baita Gipuzkoako bertsolaritza ere; eta aurtengo txapelketak Gipuzkoako bertsoa islatzeko eta haizatzeko helburua du” esanez hasi du prentsaurrekoa Saroi Jauregik. Txapelketako babesleei eskerrak eman ostean, Bertsozale Elkarteak Gipuzkoan abian duen proiektuaren berri eman du Jauregi lehendakariak: “Gipuzkoan bertsolaritza sendo dago. Bertso Eskoletan eta Hezkuntza Arautuan Proiektuak aurrera darraio indar betean, eta horren adierazle eta isla da aurtengo Txapelketako parte-hartzaileen maila eta kopurua”, adierazi du Jauregik.

Gpuntua 2011

“Inoizko txapelketarik “handiena” izatera dator aurtengoa; eta erronka handia izango da Gipuzkoako Elkartearentzat, gogoeta sakonaren ostean, besteak beste, Txapelketa maiatzean hastea ebatzi baitu Gipuzkoako Elkarteak”, adierazi du Oroitz Azurmendi Gipuzkoako Bertsozale Elkarteko koordinatzaileak. Zortzi hilabeteko Txapelketa izango da, hortaz, eta Elkarteak helburu bereziak jarri ditu aurtengorako, txapelketen ohiko helburuez gain. Gpuntua aukeratu dute aurten ere lematzat, orain lau urte lemak lortu zuen zabalkundeagatik eta Gipuzkoako bertsolaritzaren ikurrari izena eta irudia emate aldera.

Lehen fasea, datuz datu

Txapelketaren filosofiaren eta helburuen gainean jardun ostean, maiatzean jokatuko den lehen faseko datu guztiak eman ditu Oroitz Azurmendik. 76 bertsolarik hartuko dute parte Txapelketan, eta 60 hasiko dira lehen fasean. Gainontzeko 16ak irailean gehituko zaizkie: 2007ko 10 semifinalistak final zortzirenetan, eta orain lau urteko 6 finalista final laurdenetan.

Lehen fasean 20 saio jokatuko dira, 10 herritan, goiz eta arratsaldeko saiotan banaturik. Orion izango da lehen saioa eta Urretxu-Zumarragan azkena, ekainaren 5ean. Herri gehienak herri txikiak dira lehen fase honetan, eta herriotako bertso eskola eta bertsozaleekin harremanak sendotzea da helburua. Horren harira, berrikuntza gisa, herri bakoitzean bazkaria izango da herri bakoitzeko elkarte batean, eta nahi duen ororentzat irekia.

Saioetarako nahiz bazkaritarako sarrerak www.gpuntua.com webgunean salduko dira soilik eta saioetarako sarrerak Internetez guztiak saltzen ez diren heinean soilik salduko dira tokian tokiko lehiatiletan.