Teknologia albisteak

La Vanguardia, gaurdanik katalanezko edizioarekin

Sustatu

2011-05-03 : 09:05

Kataluniako egunkari historikoenak, La Vanguardiak, katalanezko paperezko edizioa du gaurdanik, egunerokoa sortu eta 130 urtera. Aldamenekoa du azala lehen ale horrek. Paperean bakarrik kontsultatu daiteke, sarean, ordaindu egin behar da (edo paperezko harpidetza egin), nahiz eta proba egin omen daitekeen. Twitterren ere badaude.

Hamabost egunkari argitaratzen dira katalanez Katalunian, eta beste hiru beste herrialde katalanetan, bat Balear Uharteetan eta bi Andorran.

Egunkari horietako batzuk eskualdekoak dira, baina nazionalak ere badaude. Nabarmentzekoak:

Avui. Garai batean egunkari bakarra, katalanismoari oso lotua, krisi latzak bizitakoa.
El Punt. Gironako eskualde egunkari gisa jaioa, orain hainbat ediziorekin, hedapen askoz zabalagoarekin.
Ara (Orain): berriena, 2010eko azaroan sortua.
El Periódico de Catalunya. La Vanguardiaren kasuan bezala, gaztelaniazko egunkari historiko eta ondo finkatua, baina katalanezko edizioarekin hasi zena duela zenbait urte.